Petrol-Diesel Price : पेट्रोल-डिझेलचे भाव वाढणार? आंतरराष्ट्रीय बाजारात कच्च्या तेलाचा भडका, जाणून घ्या तुमच्या शहरातील दर

20 ऑगस्ट 2026 रोजी भारतात पेट्रोल-डिझेलच्या दरांवर सगळ्यांचं लक्ष आहे. कारण आंतरराष्ट्रीय बाजारात कच्च्या तेलाचे भाव वाढलेले आहेत. मध्य-पूर्वेतील तणाव आणि होर्मुझच्या सामुद्रधुनीतील चिंतेमुळे ब्रेंट क्रूड तेलाचा भाव प्रति बॅरल 92 डॉलरच्या जवळ पोहोचला आहे.

मुंबई : गुरुवार, 20 ऑगस्ट 2026 रोजी पेट्रोल आणि डिझेलच्या दरांकडे सर्वांच्या नजरा लागल्या आहेत. कारण आंतरराष्ट्रीय बाजारात कच्च्या तेलाचे भाव चढेच आहेत. मध्य-पूर्वेतील भू-राजकीय तणावामुळे परिस्थिती गंभीर बनली आहे. त्यामुळे बंगळूर, दिल्ली, मुंबई, चेन्नई, हैदराबाद आणि कोलकाता यांसारख्या प्रमुख भारतीय शहरांमधील वाहनचालक इंधनाच्या दरांवर लक्ष ठेवून आहेत. कारण जागतिक ऊर्जा बाजारातील घडामोडींचा परिणाम येत्या काळात देशांतर्गत दरांवर होऊ शकतो.

ब्रेंट क्रूड तेलाचा भाव प्रति बॅरल 92 डॉलरच्या जवळ पोहोचला आहे. फ्युचर्स मार्केटमध्ये तो 0.29% वाढून 91.88 डॉलर प्रति बॅरलवर होता. याआधीच्या सत्रात मध्य-पूर्वेतील तणाव वाढल्याने तेलाच्या किमती 1% पेक्षा जास्त वाढल्या होत्या. ब्रेंट क्रूड 0.7% वाढून 91.62 डॉलर प्रति बॅरलवर स्थिरावले, तर यूएस वेस्ट टेक्सास इंटरमीडिएट (WTI) क्रूड 1% वाढून 85.83 डॉलर प्रति बॅरलवर बंद झाले.

होर्मुझच्या सामुद्रधुनीबद्दलची अनिश्चितता हे देखील ऊर्जा बाजारासाठी एक मोठं चिंतेचं कारण बनलं आहे. या महत्त्वाच्या मार्गावरील जहाजांची वाहतूक अजूनही मंदावली आहे, कारण जहाज मालक परिस्थिती सामान्य होण्याच्या स्पष्ट संकेतांची वाट पाहत आहेत. या सिच्युएशनमुळे जागतिक कच्च्या तेलाचा पुरवठा आणि वाहतुकीबद्दलची चिंता आणखी वाढली आहे.

20 ऑगस्ट रोजी प्रमुख शहरांमधील पेट्रोल आणि डिझेलचे दर

शहर	पेट्रोल दर (प्रति लिटर)	डिझेल दर (प्रति लिटर)
दिल्ली	रु 102.12	रु 95.20
मुंबई	रु 111.12	रु 97.78
कोलकाता	रु 113.43	रु 99.78
चेन्नई	रु 107.75	रु 99.57
बंगळूर	रु 110.93	रु 98.79
हैदराबाद	रु 115.69	रु 103.82

भारत आपल्या गरजेच्या 85% पेक्षा जास्त कच्च्या तेलाची आयात करतो. त्यामुळे आंतरराष्ट्रीय बाजारात तेलाच्या किमती जास्त काळ वाढलेल्या राहिल्यास त्याचा भारताला मोठा फटका बसतो. कच्च्या तेलाच्या दरात सातत्याने वाढ झाल्यास भारताचे आयातीचे बिल वाढू शकते आणि महागाईचा दबावही वाढू शकतो. यामुळे भविष्यात देशांतर्गत पेट्रोल आणि डिझेलच्या दरांमध्ये बदल होण्याची शक्यताही वाढते.

भारतात प्रत्येक शहरात इंधनाचे दर वेगवेगळे असतात. कारण आंतरराष्ट्रीय दरांशिवाय इतर अनेक घटक किरकोळ दरांवर परिणाम करतात. यामध्ये केंद्र आणि राज्यांचे कर, रिफायनरी मार्जिन, वाहतूक आणि वितरण खर्च, डीलरशी संबंधित खर्च आणि डॉलरच्या तुलनेत रुपयाचे चढ-उतार या सर्वांची भूमिका महत्त्वाची असते.

ब्रेंट क्रूडचा भाव 92 डॉलरच्या जवळ राहिल्याने आणि भू-राजकीय तणावाचा जागतिक ऊर्जा बाजारावर परिणाम होत असल्याने, इंधनाच्या दरातील चढ-उतार हे ग्राहक आणि भारतीय अर्थव्यवस्थेसाठी एक महत्त्वाचा विषय बनून राहील.