Ebola Outbreak : इबोलाचा वाढता धोका! काँगो, युगांडा प्रवासाबाबत भारत सरकारचा नागरिकांना सतर्कतेचा इशारा
सार
Ebola Outbreak : आफ्रिकेतील काँगो, युगांडा आणि दक्षिण सुदानमध्ये इबोला विषाणूचा प्रादुर्भाव वाढत असल्याच्या पार्श्वभूमीवर भारत सरकारने भारतीय नागरिकांसाठी महत्त्वाची अ‍ॅडव्हायझरी जारी केली आहे.
Ebola Outbreak : आफ्रिकेतील काही देशांमध्ये इबोला विषाणूचा वाढता प्रादुर्भाव जगभरातील आरोग्य यंत्रणांसाठी चिंतेचा विषय ठरत आहे. डेमोक्रॅटिक रिपब्लिक ऑफ काँगो, युगांडा आणि दक्षिण सुदानमध्ये वाढत्या संसर्गाच्या पार्श्वभूमीवर भारत सरकारने रविवारी महत्त्वाची मार्गदर्शक सूचना जारी करत भारतीय नागरिकांना सतर्क राहण्याचा इशारा दिला आहे. जागतिक आरोग्य संघटनेने (WHO) या परिस्थितीला आंतरराष्ट्रीय सार्वजनिक आरोग्य आणीबाणी (PHEIC) घोषित केल्यानंतर केंद्र सरकारनेही खबरदारीचे उपाय अधिक कडक केले आहेत.
काँगो, युगांडा आणि दक्षिण सुदानसाठी ट्रॅव्हल अ‍ॅडव्हायझरी
आरोग्य मंत्रालयाने जारी केलेल्या मार्गदर्शक सूचनेनुसार, पुढील आदेश मिळेपर्यंत भारतीय नागरिकांनी डेमोक्रॅटिक रिपब्लिक ऑफ काँगो, युगांडा आणि दक्षिण सुदान येथे अनावश्यक प्रवास टाळावा. या देशांमध्ये वास्तव्यास असलेल्या किंवा प्रवास करणाऱ्या भारतीयांनी स्थानिक प्रशासनाने जारी केलेल्या सार्वजनिक आरोग्य नियमांचे काटेकोर पालन करण्याचे आवाहन करण्यात आले आहे. सरकारने स्पष्ट केले की, बदलत्या परिस्थितीवर सातत्याने लक्ष ठेवले जात असून जागतिक आरोग्य संघटनेच्या शिफारसीनुसारच पुढील निर्णय घेतले जातील.
WHO कडून सार्वजनिक आरोग्य आणीबाणी घोषित
जागतिक आरोग्य संघटनेने बुंदीबुग्यो प्रकारातील इबोला विषाणूच्या वाढत्या संसर्गामुळे ही परिस्थिती “Public Health Emergency of International Concern” म्हणून घोषित केली आहे. आफ्रिका CDC ने देखील काँगो आणि युगांडामध्ये सुरू असलेल्या इबोला उद्रेकाला खंडीय सुरक्षेची सार्वजनिक आरोग्य आणीबाणी घोषित केली आहे.
या पार्श्वभूमीवर प्रवेशद्वारांवर रोगनिगराणी वाढवणे, ताप असलेल्या प्रवाशांची तपासणी करणे आणि बाधित भागात जाणाऱ्या प्रवासाला परावृत्त करणे अशा तात्पुरत्या उपाययोजना लागू करण्यात आल्या आहेत.
भारतात अद्याप एकही रुग्ण नाही
आरोग्य मंत्रालयाने दिलेल्या माहितीनुसार, बुंदीबुग्यो विषाणूमुळे होणाऱ्या इबोला आजाराची एकही केस भारतात अद्याप नोंदवली गेलेली नाही. मात्र, आफ्रिकेतील वाढता संसर्ग लक्षात घेता विमानतळे आणि आंतरराष्ट्रीय प्रवेशद्वारांवर विशेष दक्षता घेतली जात आहे.सरकारने प्रवाशांना ताप, अशक्तपणा किंवा इतर संशयास्पद लक्षणे आढळल्यास तातडीने वैद्यकीय सल्ला घेण्याचे आवाहन केले आहे.
इबोला म्हणजे काय? किती गंभीर आहे धोका?
इबोला हा अत्यंत गंभीर आणि जीवघेणा विषाणूजन्य रक्तस्रावी ताप आहे. बुंदीबुग्यो विषाणू प्रकारामुळे होणाऱ्या या आजाराचा मृत्युदर खूप जास्त मानला जातो. संक्रमित व्यक्तीच्या शरीरातील द्रवांद्वारे हा विषाणू वेगाने पसरतो.
सध्या या विशिष्ट प्रकारावरील कोणतीही प्रभावी लस किंवा अधिकृत उपचारपद्धती उपलब्ध नसल्याने जागतिक आरोग्य यंत्रणांची चिंता वाढली आहे. त्यामुळे प्रतिबंधात्मक उपाय, विलगीकरण आणि प्रवास नियंत्रण यांनाच सर्वाधिक महत्त्व दिले जात आहे.