Yamuna River Cruise : दिल्लीत सुरू झाली 'नमो यमुना रिव्हर सफारी', जाणून घ्या तिकीट आणि रूट
सार
दिल्लीत 'नमो यमुना रिव्हर सफारी'ची ट्रायल रन सुरू झाली आहे. सोनिया विहार ते जगतपूर असा ५ किलोमीटरचा हा प्रवास असेल. इको-फ्रेंडली बोटीतून पर्यटकांना आता यमुनेच्या सफारीचा आनंद घेता येणार आहे.
मुंबई : दिल्लीत पहिल्यांदाच यमुना नदीत क्रूझची मजा घेता येणार आहे. दिल्ली सरकारने सोमवारी 'नमो यमुना - रिव्हर सफारी'ची ट्रायल रन सुरू केली. या इको-फ्रेंडली सफारीमुळे दिल्लीकर आणि पर्यटकांना आता पाण्यातून राजधानीचं सौंदर्य आणि इथला वारसा पाहण्याची नवी संधी मिळणार आहे.
यमुनेचा हा पट्टा आता पर्यटनाचं नवं केंद्र बनवण्याचा सरकारचा विचार आहे. ही सफारी सोनिया विहार ते जगतपूर असा ५ किलोमीटरचा टप्पा कव्हर करेल. एका राईडसाठी साधारण ४० मिनिटे लागतील. या सफारीचं तिकीट प्रति व्यक्ती ५०० रुपये ठेवण्यात आलं असून, एका क्रूझमध्ये जास्तीत जास्त ३० प्रवासी बसू शकतील. अधिकृत उद्घाटनापूर्वी चार ते पाच दिवस या सेवेची ट्रायल घेतली जाणार आहे.
जलवाहतूक आणि पर्यटनाला चालना
दिल्लीत नदीपात्रातील पर्यटनाला चालना देण्याच्या दिशेने हे एक मोठं पाऊल आहे. यमुनेच्या किनाऱ्यावर पर्यटकांना आता एक वेगळाच अनुभव मिळेल. राजधानीत जलवाहतूक आणि पर्यटनाला प्रोत्साहन देण्याच्या मोठ्या योजनेचा हा एक भाग आहे. यमुना नदीला राष्ट्रीय जलमार्ग ११० (NW-110) म्हणून घोषित करण्यात आलं असून, हा मार्ग दिल्लीतील जगतपूरपासून उत्तर प्रदेशातील प्रयागराजपर्यंत तब्बल १,०८० किलोमीटर लांब आहे.
पायाभूत सुविधा आणि विकास
बंदर, जहाजबांधणी आणि जलमार्ग मंत्रालय सोनिया विहार ते जगतपूर दरम्यान ६-७ किलोमीटरच्या राऊंड-ट्रिप कॉरिडॉरमध्ये विविध सुविधा विकसित करत आहे. यातून शहरी पर्यटन आणि जलवाहतुकीला फायदा होईल. या प्रकल्पासाठी भारतीय अंतर्देशीय जलमार्ग प्राधिकरणाने (IWAI) दिल्ली सरकारच्या महत्त्वाच्या विभागांसोबत करार केला आहे. यात पाटबंधारे आणि पूर नियंत्रण विभाग, दिल्ली विकास प्राधिकरण (DDA), दिल्ली जल बोर्ड (DJB) आणि दिल्ली पर्यटन आणि वाहतूक विकास महामंडळ (DTTDC) यांचा समावेश आहे.
या कराराअंतर्गत NW-110 च्या चार किलोमीटरच्या पट्ट्यात क्रूझ पर्यटन विकसित करण्यावर भर दिला जाणार आहे. हा कॉरिडॉर इको-फ्रेंडली क्रूझसाठी एक हब बनेल. यासाठी ३० ते ४० प्रवासी क्षमता असलेल्या इलेक्ट्रिक-सोलर हायब्रिड बोटी वापरल्या जातील. प्रवाशांच्या सुरक्षेसाठी बोटींमध्ये लाईफ जॅकेट्स आणि पब्लिक अनाउन्समेंट सिस्टीम असेल. या प्रकल्पामुळे दिल्लीच्या पर्यटनात मोठी भर पडेल आणि लोकांना नदीत फिरण्याचा एक नवा अनुभव मिळेल.