Jantar Mantar Protest : जंतर मंतरवर आता आंदोलनांना बंदी, पोलिसांनी शोधले 3 नवे पर्याय

अनेक दशकांपासून आंदोलनांचे केंद्र असलेल्या जंतर मंतरवर आता निदर्शने करता येणार नाहीत. दिल्ली पोलिसांनी आंदोलनांसाठी आता तीन नवीन ठिकाणे निश्चित केली आहेत. त्यामुळे जंतर मंतरवरील आंदोलनांचा इतिहास आता संपुष्टात आला आहे.

नवी दिल्ली : गेल्या काही महिन्यांपासून दिल्लीतील जंतर मंतर खूप चर्चेत आहे. नेहमी आंदोलने आणि निदर्शनांनी गजबजलेले जंतर मंतर आता आंदोलनाचे ठिकाण राहिलेले नाही. न्यायालयाच्या सूचनेनंतर दिल्ली पोलिसांनी आंदोलनांसाठी तीन नवीन ठिकाणे निश्चित केली आहेत. यापुढे जंतर मंतरवर आंदोलनांना परवानगी दिली जाणार नाही. त्याऐवजी रामलीला मैदानासह इतर तीन ठिकाणी परवानगी मिळण्याची शक्यता आहे.

१० ऑक्टोबर रोजी कॉक्रोच जनता पार्टीच्या (CJP) आंदोलनाला दिल्ली पोलिसांनी परवानगी नाकारली होती. यावेळी मेट्रो आणि रेल्वे वाहतूक बंद ठेवत मोठा पोलीस बंदोबस्त तैनात करण्यात आला होता. या निर्णयाला आव्हान देत वकील कपिल सिब्बल यांनी सर्वोच्च न्यायालयात धाव घेतली होती. जंतर मंतरवर परवानगी दिली नाही, तर किमान रामलीला मैदानावर तरी परवानगी द्यायला हवी होती, असा युक्तिवाद त्यांनी केला. यावर सर्वोच्च न्यायालयाने विचार करण्याच्या सूचना दिल्या होत्या. यानंतरच दिल्ली पोलिसांनी आता आंदोलनासाठी तीन नवीन ठिकाणे शोधली आहेत.

कोणते आहेत ते ३ नवीन पर्याय?

जंतर मंतरऐवजी आता रामलीला मैदान, बुराडी मैदान आणि पूर्व दिल्लीतील सीबीडी (CBD) मैदान ही आंदोलनाची नवीन ठिकाणे म्हणून निश्चित करण्यात आली आहेत. यापुढे ज्यांना आंदोलन किंवा निदर्शने करायची आहेत, त्यांना याच तीन मैदानांवर ती करावी लागतील. जंतर मंतरवर आता कोणतीही परवानगी मिळणार नाही.

जुन्या नियमांनुसार, १००० लोकांपर्यंतच्या आंदोलनासाठी जंतर मंतरवर परवानगी दिली जायची. जंतर मंतर हे सरकारच्या अतिमहत्त्वाच्या सुरक्षा क्षेत्राजवळ असल्याने तिथे जास्त गर्दीला परवानगी नव्हती. ५० हजार लोकांपर्यंतच्या सभेसाठी रामलीला मैदान, तर ५० हजारांहून अधिक लोकांसाठी बुराडी मैदान राखीव ठेवण्यात आले होते. आता जंतर मंतरच्या जागी सीबीडी मैदानाचा या यादीत समावेश करण्यात आला आहे.