Cyclone Arnab : अर्णब चक्रीवादळामुळे ओडिशात भूस्खलन, 12 जण बेपत्ता

अर्णब चक्रीवादळामुळे ओडिशाच्या गंजम जिल्ह्यात दरड कोसळून १२ जण बेपत्ता झाले आहेत. बेपत्ता लोकांचा शोध घेण्यासाठी आणि मदत पोहोचवण्यासाठी एनडीआरएफ, ओडीआरएएफ आणि नौदलाच्या मदतीने बचावकार्य वेगाने सुरू आहे.

ओडिशा : अर्णब चक्रीवादळामुळे झालेल्या मुसळधार पावसानंतर ओडिशाच्या गंजम जिल्ह्यातील भंजनगर भागातील गिडीपबाली गावात मोठी दरड कोसळली. यात १२ जण बेपत्ता झाले आहेत.

अर्णब चक्रीवादळामुळे गंजममध्ये दरड कोसळली

गंजमचे जिल्हाधिकारी व्ही. कीर्ती वासन यांनी माध्यमांना माहिती देताना सांगितलं की, पूरग्रस्त भागात प्रशासनाने बचाव आणि मदतकार्य वेगवान केलं आहे. सखल भागात आणि नदीच्या वाढत्या पाणीपातळीमुळे अडकलेल्या लोकांवर विशेष लक्ष दिलं जात आहे. बाधित लोकांना मदत करण्यासाठी एनडीआरएफ (NDRF), ओडीआरएएफ (ODRAF) आणि अग्निशमन दलाची पथकं तैनात करण्यात आली आहेत.

अन्न, पिण्याचं पाणी आणि इतर तातडीची मदत पुरवण्याची व्यवस्थाही करण्यात आली आहे. प्रशासन परिस्थितीवर बारकाईने लक्ष ठेवून आहे. लोकांची सुरक्षा आणि अत्यावश्यक सेवा पूर्ववत करण्यासाठी विविध विभागांशी समन्वय साधला जात असल्याचं त्यांनी सांगितलं. या कठीण प्रसंगी नागरिकांनी सतर्क राहावं, अधिकृत सूचनांचं पालन करावं आणि प्रशासनाला सहकार्य करावं, असं आवाहन जिल्हाधिकाऱ्यांनी केलं आहे.

बचाव मोहीम आणि अधिकाऱ्यांची नियुक्ती

जिल्हाधिकाऱ्यांनी पुढे सांगितलं की, बेपत्ता लोकांचा शोध घेण्यासाठी एनडीआरएफ, ओडीआरएएफ, अग्निशमन दल, स्पेशल ऑपरेशन ग्रुप (SOG), पोलीस आणि इतर विभागांचे १४० हून अधिक जवान बचावकार्यात गुंतले आहेत. नौदल आणि रेल्वेकडून नौदलाचं हेलिकॉप्टर आणि लाईव्ह सिस्मिक डिटेक्शन डिव्हाईस (Live SEISMIC Detection Devices) घटनास्थळी पोहोचतील, असंही ते म्हणाले. हे सर्व बेपत्ता लोक गंजम जिल्ह्यातील भंजनगर ब्लॉक अंतर्गत येणाऱ्या बैबाली पंचायतीच्या गिडीपबाली गावचे आहेत. त्यांना शोधण्यासाठी आम्ही कंधमालमध्ये मोठी बचाव मोहीम राबवत आहोत, असं भूषण यांनी सांगितलं.

आपत्ती व्यवस्थापन यंत्रणा सज्ज

'अर्णब' चक्रीवादळामुळे निर्माण झालेली पुराची परिस्थिती पाहता, गृहनिर्माण आणि नगरविकास विभागाने १० सहाय्यक आयुक्त, कार्यकारी अधिकारी आणि अभियंत्यांना गंजमच्या जिल्हाधिकाऱ्यांच्या मदतीसाठी पाठवलं आहे. यामुळे जिल्ह्यातील पूर व्यवस्थापन आणि मदतकार्याला गती मिळेल. तैनात करण्यात आलेल्या अधिकाऱ्यांमध्ये खंडापाडा एनएसीचे कार्यकारी अधिकारी अभिषेक मिश्रा (ORS), ओडागाव एनएसीचे कार्यकारी अधिकारी निहार रंजन बेहरा (ORS), दसपल्ला एनएसीचे कार्यकारी अधिकारी अविनाश मोहंती (OMAS), भुवनेश्वर बीएमसीचे सहाय्यक आयुक्त बाबुला दलाई (ORS), भुवनेश्वर बीएमसीचे सहाय्यक आयुक्त देबाशिष बेहरा (OMAS), जटणी नगरपालिकेचे एईई पतितपावन पटनायक, भुवनेश्वर बीएमसीचे एईई जयंत कुमार मैत्रा, भुवनेश्वर बीएमसीचे सहाय्यक अभियंता जादबेंद्र महापात्रा, कटक केएमसीचे सहाय्यक अभियंता चित्तरंजन स्वैन आणि खोर्धा नगरपालिकेचे सहाय्यक अभियंता सत्य नारायण मंडल यांचा समावेश आहे.

सार्वजनिक आरोग्य आणि सुरक्षिततेचे उपाय

पूरग्रस्त शहरी स्थानिक स्वराज्य संस्थांमध्ये (ULBs) पिण्याच्या पाण्याचा पुरवठा आणि स्वच्छतेच्या व्यवस्थेवर लक्ष ठेवण्यासाठी WATCO आणि PHEO च्या पथकांची नियुक्ती करण्यात आली आहे. पिण्याच्या पाण्याचे स्रोत सुरक्षित ठेवण्यावर आणि पुरानंतर जलजन्य आजारांचा प्रादुर्भाव रोखण्यावर विशेष भर दिला जात आहे. पाण्याचे सर्व स्रोत आणि सार्वजनिक पाणीपुरवठा केंद्रे स्वच्छ आणि निर्जंतुक केली जाणार आहेत. पूर ओसरल्यानंतरची स्वच्छता आणि बाधित भागात आरोग्याच्या दृष्टीने सुरक्षित वातावरण निर्माण करण्यालाही तितकंच प्राधान्य दिलं जात आहे. सार्वजनिक आरोग्याचं रक्षण करण्यासाठी आणि सर्व बाधित भागात पिण्याचं शुद्ध पाणी आणि अत्यावश्यक नागरी सुविधा उपलब्ध करून देण्यासाठी सरकार कटिबद्ध आहे. तैनात केलेले अधिकारी आणि विभागीय पथकं यांच्यात समन्वय साधून मदतकार्य वेगाने पूर्ण करण्याचे प्रयत्न सुरू आहेत.

मुसळधार पावसाची शक्यता आणि विद्यार्थ्यांची सुरक्षितता लक्षात घेऊन गंजम जिल्ह्यातील सर्व अंगणवाड्या, शाळा, पदवी महाविद्यालये, तांत्रिक संस्था आणि विद्यापीठे ०३.११.२०२६ पर्यंत बंद राहतील. मात्र, शिक्षक आणि कर्मचारी त्यांच्या कर्तव्यावर हजर राहतील, अशी माहिती जिल्हाधिकारी कार्यालयाने 'एक्स' (X) वर दिली आहे.