काँग्रेस आणि संसदीय पक्षाची आज बैठक, विरोधी पक्षनेत्याच्या नावाला

काँग्रेस कार्यकारिणी आणि पक्षाच्या संसदीय पक्षाच्या बैठकी शनिवारी होणार असून त्यात प्रामुख्याने लोकसभा निवडणुकीतील पक्षाच्या चांगल्या कामगिरीवर चर्चा होणार आहे. ११ वाजता कार्यकारिणीची बैठक होणार असून, सायंकाळी ५:३० वाजता संसदीय पक्षाची बैठक बोलावण्यात आली आहे.

लोकसभेचे नवनिर्वाचित सदस्य आणि राज्यसभेचे सदस्य संसदीय पक्षाच्या बैठकीला उपस्थित राहणार आहेत. या बैठकीत लोकसभेतील काँग्रेस संसदीय पक्षाच्या नेत्याच्या निवडीचाही विचार होऊ शकतो. काँग्रेस संसदीय पक्षाचा नेता लोकसभेतील विरोधी पक्षनेता असेल.

सूत्रांनी दिलेल्या माहितीनुसार, सोनिया गांधी यांची काँग्रेस संसदीय पक्षाच्या नेत्यापदी पुन्हा निवड होऊ शकते. यानंतर त्या नवीन विरोधी पक्षनेत्याची निवड करतील. काँग्रेसच्या अनेक नेत्यांनी राहुल गांधी यांना लोकसभेतील विरोधी पक्षनेते करण्याचा प्रस्ताव ठेवला आहे. त्याचबरोबर मल्लिकार्जुन खरगे हे राज्यसभेतील विरोधी पक्षनेतेपदी कायम राहण्याची शक्यता आहे.

जयराम रमेश यांनी माहिती दिली -
तत्पूर्वी, काँग्रेसचे सरचिटणीस जयराम रमेश यांनी 'X' वर पोस्ट केले, "भारतीय राष्ट्रीय काँग्रेसच्या उद्याच्या बैठकीचे वेळापत्रक खालीलप्रमाणे आहे. हॉटेल अशोक येथे सकाळी ११ वाजता विस्तारित काँग्रेस कार्यकारिणीची बैठक होणार आहे. त्यानंतर दुपारी एकच्या सुमारास पत्रकार परिषद होणार आहे. संसदेच्या सेंट्रल हॉलमध्ये (संविधान सदन) सायंकाळी साडेपाच वाजता सर्व नवनिर्वाचित लोकसभा सदस्य आणि राज्यसभा सदस्यांच्या काँग्रेस संसदीय पक्षाची बैठक होणार आहे.

विस्तारित CWC आणि CPP सदस्यांसाठी हॉटेल अशोक येथे डिनरचेही आयोजन करण्यात आले असल्याची माहिती त्यांनी दिली. या लोकसभा निवडणुकीत काँग्रेसने ९९ जागा जिंकल्या आहेत. गेल्या लोकसभा निवडणुकीत पक्षाला ५२ जागा मिळाल्या होत्या.

काँग्रेस उत्तर प्रदेशातील ४०३ विधानसभा मतदारसंघात आभार यात्रा काढणार आहे. उत्तर प्रदेशातील जबाबदार नागरिक आणि मतदारांनी या देशाची राज्यघटना आणि लोकशाही वाचवण्यात अग्रेसर भूमिका बजावली असून आम्ही त्यांचा आभार प्रदर्शन यात्रेत सन्मान करू, असे काँग्रेसचे म्हणणे आहे.