Chennai Sinkhole: चेन्नईत चालत्या गाडीला रस्त्याने गिळलं, १० फुटांच्या खड्ड्यात कार कोसळली
सार
तमिळनाडूमध्ये एक रस्ता अचानक खचला आणि तयार झालेल्या १० फूट खोल खड्ड्यात एक चालती कार कोसळली. सुदैवाने कारमधील महिला आणि पुरुष सुखरूप बचावले आहेत. ज्या ठिकाणी मेट्रोचं काम सुरू आहे, तिथेच हा प्रकार घडला. या घटनेचा व्हिडिओ व्हायरल होत असून, लोक चेन्नईच्या रस्त्यांची तुलना बंगळुरूशी करत आहेत.
चेन्नईतील टायडल पार्कजवळील तिरुवान्मियुर रस्त्याचा एक भाग गुरुवारी सकाळी अचानक खचला. यामुळे तिथे एक मोठा खड्डा तयार झाला आणि त्यावरून जाणारी एक कार थेट आत कोसळली. घटनास्थळावरून समोर आलेल्या दृश्यांमध्ये ही कार सुमारे १० फूट खोल खड्ड्यात उलटलेली दिसत आहे. रस्ता अचानक खचल्याने चालकाला सावरण्याची संधीच मिळाली नाही, गाडीचा तोल गेला आणि ती थेट खड्ड्यात पडली.
🚨 चेन्नईच्या OMR वर रस्ता अचानक खचल्याने कार उलटली. https://t.co/fiHwaSnKJi
— Pulse of the People (@CitizenPulseX) October 8, 2026
दोन्ही प्रवासी सुखरूप बचावले
कार खड्ड्यात पडली तेव्हा आत एक पुरुष आणि एक महिला होती. या घटनेनंतर दोन्ही प्रवासी सुखरूप असल्याची माहिती पोलीस सूत्रांनी दिली. रस्ता खचल्याने वाहनचालकांमध्ये भीतीचं वातावरण निर्माण झालं आणि परिसरात मोठी वाहतूक कोंडी झाली. 'इंडिया टुडे'च्या वृत्तानुसार, या मार्गावर सध्या मेट्रो रेल्वेचं बांधकाम सुरू आहे.
मेट्रोच्या कामगारांनी आता या ठिकाणी दुरुस्तीचं काम सुरू केलं आहे. प्रशासनाकडून रस्त्याचा हा खराब झालेला भाग सुरक्षित करण्याचं काम सुरू असल्याने वाहतूक संथ गतीने सुरू होती.
चेन्नईतील खड्ड्याच्या व्हिडिओवर लोकांच्या प्रतिक्रिया
खड्ड्यात उलटलेल्या कारचे व्हिडिओ सोशल मीडियावर वेगाने व्हायरल झाले. एवढी मोठी घटना घडूनही याची फारशी चर्चा का होत नाहीये, असा सवाल काही युजर्सनी विचारला. तर काहींनी या परिस्थितीची तुलना बंगळुरूमध्ये खचणाऱ्या रस्त्यांशी केली.
चेन्नईतील सर्वात वर्दळीच्या रस्त्यांपैकी एक रस्ता खचला एवढंच नाही, तर तो एका संपूर्ण कारला गिळेल इतका मोठा होता. हा व्हिडिओ अजून व्हायरल का झाला नाही? https://t.co/PWkhjbujK2
— Deepak Bopanna (@dpkBopanna) October 8, 2026
काही पोस्ट्समध्ये या चर्चेला राजकीय रंगही दिला गेला. तमिळनाडू सरकार आणि तिथल्या राजकीय नेतृत्वावरही काहींनी निशाणा साधला. तर काहींनी शहरातील मुख्य रस्त्यांची दुरवस्था आणि वाहनचालकांच्या सुरक्षेवर लक्ष वेधलं.
या घटनेमुळे मे २०२५ मध्ये OMR वरील तिरुवान्मियुर जंक्शनजवळ घडलेल्या अशाच एका घटनेच्या आठवणी ताज्या झाल्या. त्यावेळी जुनी सांडपाण्याची पाईपलाईन फुटल्याने सहा फूट खोल खड्डा तयार झाला होता आणि त्यात एक कार पडली होती. त्या घटनेत पाच जण जखमी झाले होते.
प्रशासन आता हा रस्ता पूर्ववत करण्याच्या आणि परिसरातील वाहतूक सुरळीत करण्याच्या कामाला लागलं आहे.