वऱ्हाडी थंडी सहन न झाल्याने बेशुद्ध; वधूने विवाह रद्द केला

वर आणि वधूने एकमेकांना हार घातल्यानंतर कुटुंबियांसह जेवण केले. त्यानंतर पुजाऱ्याने विधी सुरू करताच वर बेशुद्ध झाला. 

झारखंडमधील देवघर येथे लग्नादरम्यान वर थंडी सहन न झाल्याने बेशुद्ध पडल्याने वधूने लग्न रद्द केले. देवघरमधील घोरमारा येथील अर्णव आणि बिहारमधील भागलपूर येथील अंकिता यांच्या लग्नादरम्यान ही अनपेक्षित घटना घडली, असे टाइम्स ऑफ इंडियाने वृत्त दिले आहे. लग्नाच्या आयोजनाबाबत वधूला आधीच काही मतभेद आणि असमाधान होते, असे वृत्त आहे.

अतिशय थाटामाटात झालेल्या लग्न समारंभात सर्व विधी नियमानुसार पार पडले. थंड हवामानात वऱ्हाडी आणि वधूने हार घालण्याच्या विधीने लग्न समारंभाची सुरुवात झाली. त्यानंतर वधू-वरांसह कुटुंबीय आणि पाहुण्यांनी जेवण केले. लग्नातील शेवटचा आणि सर्वात महत्त्वाचा विधी म्हणजे फेऱ्यांसाठी सगळे तयार झाले. विधीसाठी पुजाऱ्याने मंत्र म्हणायला सुरुवात केली तेव्हाच थंडी सहन न झाल्याने वर मंडपातच बेशुद्ध होऊन पडला.

वरच्या नातेवाईकांनी तातडीने त्याला प्रथमोपचार दिले आणि स्थानिक डॉक्टरकडून वैद्यकीय मदत घेतली. दीड तासानंतर अर्णव शुद्धीवर आला. मात्र, वराच्या आरोग्याबाबत वधूने चिंता व्यक्त केली आणि लग्न रद्द करण्याचा निर्णय घेतला. लग्नात उपस्थित असलेल्या सर्वांना सहन होणारी थंडी वराला सहन न होणे ही एखाद्या आजाराची लक्षणे असू शकतात, असे वधूने म्हटले. लग्न मोडल्यानंतर दोन्ही कुटुंबात वाद झाला. हा वाद विकोपाला जात असतानाच पोलिस आले आणि कोणताही अनुचित प्रकार घडण्याआधीच लग्न रद्द करण्यात आले.