BRICS Dinner : पनीर लबाबदारमध्ये कांद्याऐवजी 'या' खास गोष्टीचा वापर; जगभरातील नेतेही झाले फॅन!

BRICS परिषदेतील डिनरची सध्या जोरदार चर्चा सुरू आहे. या डिनरमध्ये भारतीय संस्कृती आणि परंपरा दाखवणारे अनेक खास पदार्थ होते. पण त्यातल्या एका पदार्थाने सर्वांचं लक्ष वेधून घेतलंय. जाणून घ्या या स्पेशल डिशबद्दल.

मुंबई : दिल्लीच्या भारत मंडपममध्ये दोन दिवसांपासून सुरू असलेली BRICS परिषद यशस्वीरित्या पार पडली. या परिषदेतील चर्चांसोबतच सध्या BRICS डिनरचीही जोरदार चर्चा सुरू आहे. पंतप्रधान मोदींनी शी जिनपिंग, पुतिन यांच्यासह अनेक जागतिक नेत्यांसाठी या 'गाला डिनर'चं आयोजन केलं होतं.या डिनरचं वैशिष्ट्य म्हणजे, यात भारतीय परंपरा आणि समृद्ध संस्कृती दाखवणारे अनेक खास पदार्थ होते. आता या डिनर मेन्यूचे फोटो सोशल मीडियावर व्हायरल होत आहेत.

यातही 'पनीर लबाबदार' या पदार्थाने सगळ्यांचं लक्ष वेधून घेतलं आहे. उत्तर भारतात प्रसिद्ध असलेल्या या डिशसाठी नेहमीच्या कांद्याऐवजी 'शॅलट्स' (sambar onion) म्हणजेच आपल्याकडच्या सांबार कांद्याचा वापर करण्यात आला होता. ही गोष्ट आता खवय्यांच्या आणि शेफ लोकांच्या चर्चेचा विषय बनली आहे. ऐकायला ही गोष्ट खूप छोटी वाटत असली तरी, पदार्थाची चव पूर्णपणे बदलण्याची ताकद या शॅलट्समध्ये आहे.

आपल्याला माहीत आहे की, लबाबदारची ग्रेव्ही बनवण्यासाठी मोठा कांदा, टोमॅटो आणि काजू वापरतात. पण BRICS च्या डिनरमध्ये नेहमीच्या कांद्याऐवजी शॅलट्स का वापरले, याबद्दल अनेकांना उत्सुकता आहे.

फरक काय आहे?
* मोठा कांदा हा एकच गड्डा म्हणून वाढतो.
* शॅलट्स हे लसणासारखे लहान-लहान गड्ड्यांच्या स्वरूपात वाढतात.
* दक्षिण भारतात याला 'सांबार कांदा' म्हणतात.
* हा सांबार कांदा आकाराने लहानच असतो.
* दोन्ही कांदे असले तरी चवीत खूप मोठा फरक आहे.
* मोठा कांदा जास्त तिखट आणि उग्र वासाचा असतो.
* शॅलट्सना उग्र वास नसतो आणि ते चवीला थोडे गोडसर असतात.

जेव्हा शॅलट्स तेल किंवा बटरमध्ये परतले जातात, तेव्हा ते नेहमीच्या कांद्यापेक्षा वेगळे लागतात. जसजसे ते शिजतात, तसतसा त्यांचा गोडवा वाढतो. त्यामुळे ग्रेव्हीला एक वेगळीच चव येते. पनीर लबाबदारमध्ये शॅलट्स वापरण्याचं कारण म्हणजे, यामुळे कांद्याचा उग्रपणा कमी होतो आणि टोमॅटो व इतर मसाल्यांची खरी चव आणि सुगंध अधिक चांगल्याप्रकारे जाणवतो, असं शेफ सांगतात.

BRICS मेन्यूमध्ये अजून काय काय होतं?
BRICS चा मेन्यू भारताची खाद्यसंस्कृती जगासमोर मांडणारा होता. यात फक्त पनीर लबाबदारच नाही, तर खांडवी मिले फ्यूई (Khandvi mille feuille), खुंब गलौटी (Khumb Galouti), काश्मिरी गुच्छी चेरमिक (Kashmiri Gucchi Chermic - एक प्रकारची मशरूम), विविध धान्यांचा पुलाव, बीटरूट रायता, कॅरट बीन्स पोरियल, जिलेबीसोबत फ्रूट क्रीम आणि गोल्ड लीफ असे अनेक पदार्थ पाहुण्यांना वाढण्यात आले होते.