भाजप नेते संबित पात्रा यांनी राहुल गांधींना देशद्रोही का म्हटले?

नवी दिल्ली: लोकसभा अधिवेशनात काँग्रेस पक्षाने अदानी प्रकरण उपस्थित करून केंद्र सरकारला अडचणीत आणण्याचा प्रयत्न केला. या दरम्यान, भाजपचे प्रवक्ते संबित पात्रा यांनी थेट लोकसभा विरोधी पक्षनेते राहुल गांधींवर लक्ष्य करून टीका केली आहे. तुम्ही सर्वजण संसदेत काय चालले आहे हे पाहत आहात. देशाची अर्थव्यवस्था कमकुवत करण्याचे प्रयत्न सुरू आहेत. भारताच्या शेअर बाजारावर लक्ष्य केले जात आहे, असा आरोप संबित पात्रा यांनी केला.

काही शक्ती भारताच्या शेअर बाजार आणि देशातील उद्योजकांना लक्ष्य करण्याचे काम करत आहेत. या माध्यमातून ते भारत तोडण्याचा प्रयत्न करत आहेत, असा गंभीर आरोप संबित पात्रा यांनी केला. संसदेचे सदस्य आणि विरोधी पक्षनेते राहुल गांधी एक देशद्रोही आहेत असे ते म्हणाले.

जॉर्ज सोरोस ओपन सोसायटीला निधी पुरवतात. त्यानंतर देशाविरुद्ध अपप्रचार केला जातो. हे देशाच्या एकते आणि सार्वभौमत्वाला धोका निर्माण करत आहे, असे संबित पात्रा म्हणाले. काही देशविरोधी शक्ती भारत तोडू इच्छितात. फ्रेंच वृत्तपत्राने याबाबत काही खुलासे केले आहेत. राहुल गांधी यांनीही जॉर्ज सोरोस यांची भेट घेतली आहे. दोघांमध्ये संबंध आहेत आणि राहुल गांधी देशद्रोही आहेत असे म्हणण्यात काहीही गैर नाही, असे ते म्हणाले.

यापूर्वी विरोधी पक्षनेत्यांनी संसद परिसरात उद्योजक गौतम अदानी यांच्या प्रकरणी केंद्राविरुद्ध निदर्शने केली. निदर्शनादरम्यान "मोदी आणि अदानी दोघेही एक" अशा घोषणा दिल्या. विरोधी पक्षांनी गौतम अदानी यांच्याविरुद्ध चौकशी करण्याची मागणी संसदेत केली आहे.