Bihar Next CM : बिहारचे पुढचे मुख्यमंत्री कोण? एका फोटोत दडलंय सगळं 'राज'कारण!

Bihar Next CM : नितीश कुमार यांच्यानंतर बिहारचे पुढचे मुख्यमंत्री कोण होणार? या एका फोटोमुळे चर्चांना उधाण आलंय. कारण यात अमित शाह, नितीश कुमार, भाजप अध्यक्ष नितीन नवीन आणि मुख्यमंत्रिपदाचे प्रबळ दावेदार सम्राट सिंह चौधरी एकत्र दिसत आहेत.

बिहारमध्ये राजकीय बदलांचे वारे वाहत आहेत. नितीश कुमार यांनी राज्यसभेसाठी अर्ज भरल्यापासून पाटणा ते दिल्लीपर्यंत एकच चर्चा आहे - बिहारचा पुढचा मुख्यमंत्री कोण? मुख्यमंत्री भाजपचाच असेल हे जवळपास निश्चित आहे. अनेक नावं चर्चेत असली तरी, या फोटोमुळे सगळं ठरल्याचं बोललं जातंय. कारण यात निर्णय घेणारे अमित शाह, भाजप अध्यक्ष नितीन नवीन, स्वतः नितीश कुमार आणि मुख्यमंत्रिपदाच्या शर्यतीत आघाडीवर असलेले सम्राट सिंह चौधरी दिसत आहेत. त्यामुळे या बैठकीत नाव निश्चित झालं असण्याची दाट शक्यता आहे.

बिहारच्या राजकारणातील जाणकारांच्या मते, जर कुर्मी समाजाचे मुख्यमंत्री (नितीश कुमार) पायउतार होत असतील, तर जातीय समीकरणानुसार कोईरी समाजाचा नेता मुख्यमंत्री होऊ शकतो. कारण बिहारमध्ये कुर्मी आणि कोईरी यांना 'लव-कुश' समीकरण मानलं जातं. या दोन जातींपैकीच मुख्यमंत्री झाल्यास सत्तेचा समतोल साधला जाईल. त्यामुळेच सम्राट चौधरी सध्या मुख्यमंत्रिपदाच्या शर्यतीत आघाडीवर आहेत.

बिहारमध्ये कुणीतरी नवीन चेहराही मुख्यमंत्री होऊ शकतो, अशीही चर्चा मीडियामध्ये आहे. कारण भाजप अशा बाबतीत नेहमीच धक्कातंत्राचा वापर करते. राजस्थान, मध्य प्रदेश, छत्तीसगड आणि अगदी ओडिशामध्येही भाजपने अनपेक्षित चेहरे दिले. त्यामुळे पंतप्रधान मोदी आणि अमित शाह यांची जोडी पुन्हा एकदा धक्कादायक निर्णय घेऊ शकते, म्हणून कोणताही अंदाज बांधणं घाईचं ठरेल.

सम्राट सिंह चौधरींनंतर दुसरं नाव केंद्रीय गृह राज्यमंत्री नित्यानंद राय यांचं आहे. ते यादव समाजातून येतात आणि गृहमंत्री अमित शाह यांचे निकटवर्तीय मानले जातात. बिहारमध्ये यादव समाजाचा मुख्यमंत्री देऊन भाजप पुढच्या वर्षी सर्वात मोठ्या राज्यात, म्हणजेच उत्तर प्रदेशमध्ये यादव मतदारांना आकर्षित करू शकते. त्यामुळे भाजप त्यांच्या नावावरही डाव खेळू शकते, असं म्हटलं जातंय.