Bhopal Mock Drill: भोपाळमध्ये मॉक ड्रिलदरम्यान अग्निशमन दलाच्या गाडीने महिलेला चिरडले, व्यापाऱ्यांचा संताप

भोपाळच्या न्यू मार्केटमध्ये महानगरपालिकेच्या मॉक ड्रिलदरम्यान एका ४५ वर्षीय महिलेला अग्निशमन दलाच्या गाडीने धडक दिली. या अपघातात महिलेच्या पायाला गंभीर दुखापत झाली असून तिच्यावर शस्त्रक्रिया सुरू आहे.

भोपाळच्या न्यू मार्केटमध्ये शुक्रवारी संध्याकाळी महानगरपालिकेचे मॉक ड्रिल सुरू होते. यावेळी अग्निशमन दलाच्या एका गाडीने एका महिलेला जोरदार धडक दिली. या अपघातात आपला पाय मोडल्याचा आणि नवऱ्यालाही गाडीने चिरडल्याचा आरोप या महिलेने केला आहे.

महिलेच्या म्हणण्यानुसार, अग्निशमन दलाची गाडी खूप वेगात होती. ती एका दुकानाजवळ उभी असतानाच गाडी थेट दुकानात घुसली. तिला तिथून बाजूला व्हायलाही वेळ मिळाला नाही.

एका व्हिडिओमध्ये व्हीलचेअरवर बसलेली ही महिला सांगतेय, "अशाने लोकांचा जीव जाईल, असं आम्ही त्यांना सांगत होतो. पण ते न थांबता आणि न बघता लोकांच्या अंगावर गाडी घालत होते. आम्हाला हलायलाही वेळ मिळाला नाही. गाडी थेट दुकानातच घुसली. माझ्या बिचाऱ्या नवऱ्यालाही त्यांनी चिरडलं."

तिने पुढे सांगितलं की, घटनेनंतर तिथे मोठी गर्दी जमली. लोकांनी ड्रायव्हरला गाडी थांबवण्यासाठी आरडाओरडा केला, पण त्याने गाडी थांबवली नाही.

राणी उपाध्याय (वय ४५, रा. कोटरा) असे या जखमी महिलेचे नाव आहे. त्यांच्या पायाला गंभीर दुखापत झाली आहे. त्यांचे पती योगेश उपाध्याय यांनी सांगितले की, राणी यांना न्यू मार्केटमधील नाहर रुग्णालयात दाखल करण्यात आले आहे. त्यांची प्रकृती चिंताजनक असून त्यांच्या पायावर शस्त्रक्रिया केली जात आहे.

हा अपघात शुक्रवारी संध्याकाळी सव्वासहाच्या सुमारास खेदापती हनुमान मंदिराजवळ झाला. महिला जखमी झाल्यानंतर सुमारे २०० फेरीवाले आणि व्यापाऱ्यांनी महानगरपालिकेच्या टीमला घेराव घातला आणि या कारवाईच्या विरोधात जोरदार घोषणाबाजी केली.

न्यू मार्केट ट्रेडर्स असोसिएशनचे अध्यक्ष प्रदीप गुप्ता यांनी सांगितले की, गेल्या तीन दिवसांपासून सुरू असलेल्या या मॉक ड्रिलमुळे व्यापारी खूप वैतागले आहेत आणि त्यांना धड व्यवसायही करता येत नाहीये.

दुसरीकडे, अतिक्रमण विभागाचे प्रभारी शैलेंद्र सिंह भदोरिया यांनी सांगितले की, जखमी महिलेला जीपमधून रुग्णालयात नेण्यात आले होते. त्यानंतर ती कुटुंबासोबत घरी गेली. अधिकाऱ्याच्या मते, ही दुखापत किरकोळ होती. न्यू मार्केटमधील फेरीवाल्यांना हटवून त्यांना टीटी नगर स्टेडियमजवळ हलवण्याचा निर्णय घेण्यात आल्याचेही त्यांनी सांगितले.

त्यांच्या म्हणण्यानुसार, या मुद्द्यावरून फेरीवाल्यांनी यापूर्वीही वाद घातला होता.