Bengaluru Rental Market: ३०-३५ हजारांत बंगळुरूत घर मिळतंय का? एका कपलचा अनुभव वाचून थक्क व्हाल!

बंगळुरूच्या BTM आणि HSR लेआउटमध्ये 2BHK भाड्याने शोधताना एका कपलला चांगलाच मनस्ताप सहन करावा लागत आहे. ३० ते ३५ हजार बजेट असूनही त्यांना खोट्या जाहिराती, अचानक वाढवलेलं भाडं आणि ब्रोकरच्या मनमानीचा सामना करावा लागतोय.

बंगळुरूमध्ये एक साधं 2BHK घर भाड्याने शोधणं आता खूपच कठीण काम झालं आहे. घर शोधणं आणि ते पाहणं ही तशी सोपी प्रक्रिया असायला हवी होती. पण एका कपलला जुन्या जाहिराती, अचानक वाढवलेलं भाडं आणि अजिबात प्रतिसाद न देणाऱ्या ब्रोकर्समुळे चांगलाच मनस्ताप सहन करावा लागत आहे.

या तरुणाने Reddit वर आपला अनुभव शेअर केला आहे. तो आणि त्याची पार्टनर BTM 2nd Stage, BTM 4th Stage किंवा HSR Layout मध्ये सेमी-फर्निश्ड 2BHK घर शोधत आहेत. त्यांना सप्टेंबरच्या अखेरीस राहायला जायचं आहे आणि त्यांचं महिन्याचं बजेट ३०,००० ते ३५,००० रुपये आहे.

घर शोधणं इतकं कठीण का झालंय, हे सांगताना या Reddit युझरने लिहिलंय, "मी आणि माझी पार्टनर लिव्ह-इनमध्ये राहतो. आम्ही BTM 2nd Stage, BTM 4th Stage किंवा HSR Layout च्या आसपास ३०-३५ हजार रुपये महिना बजेट असलेलं 2BHK सेमी-फर्निश्ड घर शोधत आहोत. आम्हाला सप्टेंबरच्या अखेरीस शिफ्ट व्हायचं आहे. पण खरं सांगायचं तर, इथे एखादी खरी जाहिरात शोधणं हे आता फुल-टाइम काम बनलं आहे."

त्याच्या म्हणण्यानुसार, अनेक घरं भाड्याने देऊन झाल्यानंतरही रेंटल अ‍ॅप्सवर 'अव्हेलेबल' (उपलब्ध) म्हणून दिसत राहतात. तसंच, ऑनलाइन जाहिरातीत दाखवलेलं भाडं, प्रत्यक्षात संपर्क साधल्यावर अचानक वाढवलं जातं, असा दावाही त्याने केला.

"प्रत्येक अ‍ॅपवर सारखीच अडचण आहे. 'अव्हेलेबल' असलेली घरं आठवड्याभरापूर्वीच भाड्याने दिलेली असतात. तुम्ही ३२ हजार भाडं असलेल्या घरासाठी फोन करता आणि अचानक ते ३८-४० हजार + मेंटेनन्स असं सांगितलं जातं. 'मालक' म्हणून दिलेल्या जाहिराती प्रत्यक्षात ब्रोकर्सच्या निघतात. घराचं नेमकं लोकेशन किंवा माहिती विचारली की ब्रोकर्स रिप्लाय देणं बंद करतात. काही जण तर फोनच उचलत नाहीत आणि काहींनी तर लोकेशनवर पोहोचल्यावर आम्हाला भलतंच घर दाखवलं," असंही त्याने पुढे सांगितलं.

त्यांच्या बजेट आणि गरजेनुसार एखादं घर मिळालंच, तरी त्यांच्या अडचणी संपत नाहीत. अनेकदा घर फायनल करून भाड्याचा व्यवहार पूर्ण करण्याआधीच ती चांगली घरं दुसरा कुणीतरी बळकावतो, असंही त्याने नमूद केलं.

नेटकऱ्यांच्या प्रतिक्रिया

या पोस्टवर कमेंट करताना इतर Reddit युझर्सनीही बंगळुरूच्या रेंटल मार्केटमधले आपले अनुभव शेअर केले आहेत.

एका युझरने कमेंट केली, "भावा, खरं सांगतो, HSR चा भाग सर्वात वाईट आहे. मी सुद्धा जवळपास सहा महिने याच परिस्थितीत होतो. खूप धडपड केल्यानंतर मी JP Nagar ला राहायला गेलो आणि तिथे मला एक मस्त फ्लॅट मिळाला! घर खूप छान आहे, पण ट्रॅफिकमधून प्रवास करणं खूपच त्रासदायक आहे. HSR ची अवस्था खरंच खूप वाईट आहे मित्रा!"

"माझीही तीच अवस्था आहे - यातून कसं बाहेर पडावं हेच समजत नाहीये," असं दुसऱ्या एका युझरने म्हटलं.

तिसऱ्या युझरने लिहिलं, "मलाही हाच त्रास सहन करावा लागतोय. कुणीतरी प्लीज मला मदत करा."