Bengaluru Crime: बंगळुरूत तरुणीच्या PG रूममध्ये शिरला, अंतर्वस्त्र आणि सॅनिटरी पॅड चोरले; विकृत तरुणाला अटक
सार
बंगळुरूमध्ये एका को-लिव्हिंग पीजीमध्ये राहणाऱ्या २५ वर्षीय तरुणीसोबत एक धक्कादायक प्रकार घडला. तिच्याच पीजीमध्ये राहणाऱ्या एका तरुणाने तिच्या रूममध्ये घुसून तिची अंतर्वस्त्रं आणि सॅनिटरी पॅड्स चोरले. इतकंच नाही, तर त्याने या वस्तूंचा वापर विकृतपणे केला.
बंगळुरूमध्ये एका २५ वर्षीय तरुणीसोबत एक धक्कादायक प्रकार घडला आहे. ती कामावर गेल्यानंतर तिच्याच पीजीमध्ये राहणारा एक तरुण तिच्या रूममध्ये शिरला. त्याने तिची अंतर्वस्त्रं आणि सॅनिटरी पॅड्स चोरले आणि त्या वस्तूंसोबत घाणेरडं कृत्य केलं. हा सगळा प्रकार सीसीटीव्ही कॅमेऱ्यात कैद झाला, ज्यामुळे आरोपीची ओळख पटवणं सोपं झालं. आरोपी त्याच पीजीमध्ये राहणारा दुसरा रहिवासी निघाला.
पोलिसांनी या प्रकरणी ३५ वर्षीय गिरिराज डी याला अटक केली आहे. तो मूळचा आंध्र प्रदेशच्या विशाखापट्टणम जिल्ह्यातील रहिवासी आहे.
नमिता (नाव बदललं आहे) नावाच्या तरुणीने याबद्दल तक्रार दाखल केली आहे. ती एका खासगी कंपनीत कामाला आहे आणि गेल्या तीन महिन्यांपासून बंगळुरूतील कोरमंगलाच्या ६ व्या ब्लॉकमधील 'झोलो हेझेल' नावाच्या पीजीमध्ये राहते. ती तिच्या रूममेट सिंचना (नाव बदललं आहे) सोबत पहिल्या मजल्यावरच्या रूममध्ये राहते. या रूमच्या चाव्या फक्त त्या दोघींकडेच होत्या.
दोघींच्या कामावर जाण्याच्या वेळा वेगवेगळ्या असल्यामुळे, त्या सहसा रूम बंद ठेवत, पण कुलूप लावत नसत.
२४ ऑगस्टला सकाळी ७.२० च्या सुमारास नमिता आणि सिंचना रूमला कुलूप न लावताच बाहेर पडल्या. पोलिसांनी दिलेल्या माहितीनुसार, याच संधीचा फायदा घेत गिरिराज त्यांच्या रूममध्ये घुसला. त्याने नमिताची अंतर्वस्त्रं आणि सॅनिटरी पॅड्ससारख्या काही खासगी वस्तू चोरल्या आणि त्या विकृत पद्धतीने मांडून ठेवल्या.
जेव्हा नमिता परत आली, तेव्हा तिला तिच्या वस्तू अस्ताव्यस्त पडलेल्या दिसल्या आणि काही वस्तू गायब होत्या. हे पाहून तिला धक्काच बसला. तिने लगेच पीजी मॅनेजमेंटला सांगितलं आणि नंतर सीसीटीव्ही फुटेज तपासलं.
फुटेजमध्ये एक व्यक्ती तिच्या रूममध्ये शिरून चोरलेल्या वस्तूंशी विकृत चाळे करताना दिसला. फुटेज नीट पाहिल्यावर नमिताने त्याला ओळखलं. तो त्याच बिल्डिंगच्या दुसऱ्या मजल्यावर राहणारा गिरिराज होता.
सुरुवातीला नमिता किंवा पीजीच्या इंचार्जने पोलिसांशी संपर्क साधला नाही. पण दुसऱ्या दिवशी सकाळी ६.५० वाजता गिरिराजने पुन्हा नमिताच्या रूममध्ये घुसण्याचा प्रयत्न केला, तेव्हा प्रकरण गंभीर झालं.
आपल्या सुरक्षेची भीती वाटल्याने नमिताने थेट पोलीस स्टेशन गाठलं आणि तक्रार दाखल केली.
कोरमंगला पोलिसांनी भारतीय न्याय संहितेच्या (BNS) कलम ७८ (पाठलाग करणे), ७९ (महिलेचा विनयभंग करण्याच्या हेतूने शब्द, हावभाव किंवा कृत्य करणे), ३०५ (घरात चोरी) आणि ३२९ (गुन्हेगारी अतिक्रमण) अंतर्गत गुन्हा दाखल केला आहे.
गिरिराजला सध्या न्यायालयीन कोठडी सुनावण्यात आली आहे.
एका वरिष्ठ पोलीस अधिकाऱ्याने सांगितलं की, "चौकशीदरम्यान गिरिराजने आपला गुन्हा कबूल केला आहे. तो एका ज्वेलरी शोरूममध्ये ऑडिट कन्सल्टंट म्हणून काम करतो. त्याने याआधीही अनेकदा तरुणीच्या रूममध्ये घुसून तिची अंतर्वस्त्रं चोरल्याचं मान्य केलं आहे.”