Amit Shah: कितीही प्रयत्न करा, 30 वर्षे सत्तेत येणार नाही, राहुल गांधींवर अमित शाह आणि किरण रिजिजू यांची सडकून टीका

भारत समिटमध्ये इटालियन नेत्याने केंद्र सरकारविरोधी घोषणाबाजी केल्यावर राहुल गांधींनी त्याला प्रोत्साहन दिल्याचा आरोप करत अमित शाह आणि भाजपने जोरदार टीका केली आहे.

नवी दिल्ली: राहुल गांधींवर अमित शाह आणि किरण रिजिजू यांनी सडकून टीका केली आहे. राहुल गांधींनी देशाचा अपमान केला आहे. भारत समिटमध्ये भारताविरोधी हालचालींवर चर्चा झाली. तुम्ही कितीही प्रयत्न केले तरी पुढील 30 वर्षे सत्तेत येणार नाही, असे अमित शाह म्हणाले. एका विदेशी नेत्याने भारताचा अपमान केल्यावर कोणी हसताना पाहिले आहे का? भारताचा अपमान करण्यासाठी विदेशात कोण जाते, हे मी विचारत नाही, असे म्हणत किरण रिजिजू यांनी राहुल गांधींवर निशाणा साधला. तेलंगणात झालेल्या भारत समिटमध्ये एका इटालियन राजकीय नेत्याने केंद्र सरकारविरोधी घोषणा दिल्यामुळे राजकीय वाद पेटला आहे. इटालियन नेत्याला संधी देऊन राहुल गांधींनी देशाचा अपमान केला आहे आणि काँग्रेस कितीही प्रयत्न करत असली तरी 30 वर्षे सत्तेत येणार नाही, असे अमित शाह म्हणाले. विदेशी नेत्याने तसे म्हटले असेल तर आत्मपरीक्षण करण्याची वेळ आली आहे, असे काँग्रेसने प्रत्युत्तर दिले आहे.

तेलंगणा सरकारने आयोजित केलेल्या भारत समिटमध्ये युरोपियन सोशलिस्ट सेक्रेटरी जनरल आणि इटालियन राजकीय नेते गियाकोमो फिलिबेक यांनी सरकारविरोधात घोषणाबाजी केली. पंतप्रधान आणि ज्ञानेश कुमार यांना लक्ष्य करून केलेल्या घोषणांचा अर्थ 'मत चोर, खुर्ची सोडा' असा होतो, असे त्यांनी स्पष्ट केले. तसेच, भारतातील लोकशाही मोठ्या धोक्यात असल्याची टीकाही केली. यावर राहुल गांधी टाळ्या वाजवून त्यांना प्रोत्साहन देताना दिसत आहेत. याचा व्हिडिओ समोर आल्यानंतर भाजपने तीव्र निषेध नोंदवला. भारताविरोधी हालचालींना राहुल गांधींनी पाठिंबा दिल्याची टीका अमित शाह यांनी केली.

भारत समिट हा जागतिक कार्यक्रम होता आणि त्यात इटालियन नेत्याचा सहभाग चुकीचा नाही, असे काँग्रेसचे म्हणणे आहे. राहुल गांधींचे विदेश दौरे देशविरोधी शक्तींशी संबंध जोडण्यासाठी असतात, असा आरोप भाजपकडून वारंवार होत असताना हा नवा वाद निर्माण झाला आहे. फिलिबेक यांच्या सरकारविरोधी घोषणाबाजीमुळे राजनैतिक पातळीवर अस्वस्थता निर्माण होऊ शकते आणि आंतरराष्ट्रीय पातळीवरही याची चर्चा होऊ शकते. देशात लोकशाही नाही, या विरोधकांच्या टीकेलाही यामुळे बळ मिळू शकते.