१० वर्षीय आध्यात्मिक प्रवचक अ. अरोरा यांनी युट्युबरविरुद्ध दाखल केला खटला

१० वर्षीय आध्यात्मिक प्रवचक अभिनव अरोरा यांनी त्यांना ट्रोल करणाऱ्या युट्युबरविरुद्ध कायदेशीर कारवाई करण्याचा निर्णय घेतला आहे.

कृष्ण भक्त आणि १० वर्षीय आध्यात्मिक प्रवचक अभिनव अरोरा यांनी सोशल मीडियावर त्यांना सतत ट्रोल करणाऱ्या युट्युबरविरुद्ध कोर्टात धाव घेतली आहे. १० वर्षीय अभिनव अरोरा सोशल मीडियावर प्रसिद्ध आहेत. देवाची पूजा करण्याच्या त्यांच्या पद्धतीमुळे आणि देवाबद्दलच्या त्यांच्या भाषणांमुळे त्यांना सोशल मीडियावर अनेक चाहते आहेत. गणेश विसर्जनाच्या वेळी त्यांनी पूजिलेल्या गणेशाचे विसर्जन करताना अभिनव अरोरा रडले होते. हा वीडिओ खूप व्हायरल झाला होता.

पण काही युट्युबरनी या व्हिडिओचे मीम्स बनवून सोशल मीडियावर शेअर केले आणि या लहान मुलाची खिल्ली उडवली. त्यामुळे आता अभिनव अरोरा यांचे वकील पंकज आर्य यांनी ट्रोलर्सविरुद्ध कोर्टात तक्रार दाखल केली आहे. या प्रकरणाची दखल घेत न्यायालयाने पुढील सुनावणी ३ जानेवारी रोजी ठेवली आहे. आम्ही आज तक्रार दाखल केली आहे. पुढील सुनावणी ३ जानेवारी रोजी होईल, असे अभिनव अरोरा यांचे वकील पंकज आर्य यांनी सांगितले. अभिनव अरोरा आणि सनातन धर्माविरुद्ध एकाच गटातील लोकांनी मोहीम सुरू केली आहे. आम्ही याविरुद्ध न्यायालयात गेलो आहोत. सुप्रीम कोर्टात जाण्याची वेळ आली तरी आम्ही शांत बसणार नाही, या युट्युबरविरुद्ध एफआयआर दाखल करण्याची मागणी आम्ही केली आहे, असे पंकज आर्य म्हणाले.

ऑक्टोबर महिन्यात गँगस्टर लॉरेन्स बिश्नोईच्या टोळीकडून जीवाला धोका असल्याचा आरोप अभिनव अरोराच्या कुटुंबीयांनी केला होता. वृत्तसंस्था एएनआयशी बोलताना अभिनव अरोरा यांच्या आईने सांगितले की, अभिनवने देवावरील भक्तीशिवाय काहीही केले नाही, मग आम्हाला असा छळ का सोसावा लागतो? सोशल मीडियाद्वारे छळ केला जात आहे. भक्तीशिवाय धमकीचे फोन येतील असे कोणतेही काम अभिनवने केलेले नाही, त्याने खूप सहन केले आहे.

आम्हाला लॉरेन्स बिश्नोईच्या नावाने फोन आला होता, अभिनवला मारून टाकू असे त्यांनी सांगितले. त्यानंतर रात्रीही फोन आला होता, तो उचलला गेला नव्हता, सकाळी त्याच नंबरवरून आज अभिनवला मारून टाकू असा मेसेज आला होता, असे अभिनव अरोरा यांच्या आई ज्योती अरोरा यांनी सांगितले. अभिनव अरोरा हे दिल्लीतील धार्मिक कंटेंट क्रिएटर आहेत आणि त्यांनी तीन वर्षांच्या वयापासूनच आध्यात्मिक प्रवास सुरू केल्याचे ते सांगतात.