Mallika Sherawat Real Name : बॉलिवूडमध्ये येण्याआधी मल्लिका शेरावतने बदललं होतं नाव; खरं नाव काय?

अभिनेत्री मल्लिका शेरावतचं खरं नाव रीमा लांबा आहे. एका दिग्दर्शकाच्या सल्ल्यावरून तिने नाव बदललं.

हिंदी चित्रपटसृष्टीत कलाकार आपलं खरं नाव बदलून स्क्रिनवर येतात, हे काही नवीन नाही. अभिनेत्री मल्लिका शेरावतचा प्रवासही असाच आहे. सध्या ॲमेझॉन प्राइम व्हिडीओच्या 'द ट्रेटर्स २' या शोमध्ये दिसणारी मल्लिका एकेकाळी रीमा लांबा या नावाने ओळखली जायची. पण एका सल्ल्यामुळे तिने तिची ओळखच बदलून टाकली.

मशाबल इंडियाला दिलेल्या मुलाखतीत मल्लिकाने हा किस्सा सांगितला. ती म्हणाली, 'मी जेव्हा इंडस्ट्रीत आले, तेव्हा आधीच खूप 'रीमा' नावाच्या अभिनेत्री होत्या. माझ्या तेव्हाच्या दिग्दर्शकाने मला सांगितलं की, 'रीमा हे नाव स्क्रिनवर चांगलं नाही वाटणार. आपण नाव बदलूया. काहीतरी ग्लॅमरस नाव ठेवूया. रीमा नावात ग्लॅमर नाहीये.''

रीमा लांबाची मल्लिका शेरावत का झाली?

मल्लिका हे नाव तिच्या टीमने सुचवलं आणि ते तिला लगेच आवडलं. ती पुढे म्हणाली, "मी म्हटलं, 'ठीक आहे, तुम्हाला जे ठेवायचंय ते ठेवा.' मग त्यांनी 'मल्लिका' हे नाव सुचवलं आणि मला ते ऐकायला आवडलं. अशाप्रकारे 'मल्लिका' हे नाव ठरलं. पण 'शेरावत' हे आडनाव लावण्यामागे एक वेगळं कारण होतं. मी सिनेमात काम करणार आणि मुंबईला जाणार, हे कळल्यावर माझ्या घरच्यांनी माझ्याशी संबंध तोडले होते."

हे आडनाव बदलणं म्हणजे तिच्या कुटुंबाला दिलेलं एक उत्तर होतं. अभिनयाच्या निर्णयामुळे वडिलांच्या घरच्यांनी तिच्याशी नातं तोडलं होतं. त्यामुळे तिने आईचं माहेरचं आडनाव स्वीकारलं. "ते खूप पारंपरिक विचारांचे होते, म्हणून मी ठरवलं, 'तुम्ही मला काय नाकारणार, मीच तुमचं नाव नाकारते.' आणि मी माझ्या आईचं आडनाव लावलं," असं तिने स्पष्ट केलं.

मल्लिका पहिल्यांदा 'जीना सिर्फ मेरे लिये' (२००२) या सिनेमात रीमा लांबा या नावाने दिसली होती. त्यानंतर तिने मल्लिका शेरावत हे नाव धारण केलं आणि गोविंद मेनन दिग्दर्शित 'ख्वाहिश' (२००३) या सिनेमात मुख्य भूमिका साकारली.

सुरुवातीचे चित्रपट आणि त्यानंतरचा प्रवास

पण तिला खरी ओळख मिळाली ती अनुराग बासू दिग्दर्शित 'मर्डर' (२००४) या सिनेमामुळे. हा कामुक थ्रिलर त्या वर्षातील सर्वात मोठ्या हिट सिनेमांपैकी एक ठरला आणि मल्लिका घराघरात पोहोचली.

यानंतर तिने 'प्यार के साईड इफेक्ट्स' (२००६) आणि 'वेलकम' (२००७) सारख्या सिनेमांमधून आपली ओळख कायम ठेवली. बॉलिवूडमध्ये मल्लिकाशिवाय इतरही अनेक कलाकारांनी प्रसिद्धी मिळवण्यापूर्वी आपली नावं बदलली आहेत. यात अक्षय कुमार, कतरिना कैफ, सैफ अली खान, रजनीकांत, तब्बू, रेखा, महिमा चौधरी, अमिताभ बच्चन, कियारा अडवाणी, टायगर श्रॉफ आणि नर्गिस यांचा समावेश आहे.