Salman Khan Lawrence Bishnoi : २८ वर्षांपासून बिश्नोई गँग सलमान खानच्या मागे का लागलीये? काय आहे नेमकं प्रकरण?

सलमान खान आणि बिश्नोई गँगच्या दुश्मनीचं मुख्य कारण १९९८ चं काळवीट शिकार प्रकरण आहे. राजस्थानच्या जोधपूरजवळ 'हम साथ साथ हैं' च्या शूटिंगवेळी दोन काळविटांची शिकार केल्याप्रकरणी सलमानला ५ वर्षांची शिक्षा झाली होती.

मुंबई : बॉलिवूड अभिनेता टायगर श्रॉफच्या गाडीवर झालेल्या गोळीबाराची जबाबदारी बिश्नोई गँगने घेतल्याची चर्चा आहे. या घटनेनंतर या गँगची काम करण्याची पद्धत आणि त्यांच्या हेतूंवर पुन्हा एकदा चर्चा सुरू झालीये. विशेषतः बॉलिवूड सुपरस्टार सलमान खान आणि लॉरेन्स बिश्नोई गँगमध्ये अनेक वर्षांपासून सुरू असलेली दुश्मनी पुन्हा एकदा समोर आलीये. पण या रागामागचं नेमकं कारण काय? आणि टायगर श्रॉफच्या प्रकरणाशी याचा काय संबंध आहे?

१९९८ चं काळवीट शिकार प्रकरण हेच दुश्मनीचं मूळ!

सलमान खान आणि बिश्नोई गँगच्या वादाचं मुख्य कारण १९९८ चं काळवीट शिकार प्रकरण असल्याचं सांगितलं जातं. राजस्थानमधील जोधपूरजवळ 'हम साथ साथ हैं' या सिनेमाच्या शूटिंगदरम्यान दोन काळविटांची शिकार केल्याचा आरोप सलमान खानवर लागला होता. या प्रकरणात २०१८ मध्ये ट्रायल कोर्टाने त्याला पाच वर्षांची शिक्षा सुनावली होती. सध्या तो जामिनावर बाहेर असून कायदेशीर प्रक्रिया अजूनही सुरू आहे.

बिश्नोई समाजासाठी काळवीट इतकं पवित्र का आहे?

राजस्थानचा बिश्नोई समाज गुरु जंभेश्वर यांनी सांगितलेल्या २९ नियमांचं पालन करतो. निसर्गाचं रक्षण करणं, झाडे न कापणं आणि वन्यजीवांना वाचवणं ही या समाजाची मुख्य तत्त्वं आहेत. हा समाज काळविटाला अत्यंत पवित्र मानतो, त्यामुळे या शिकारीच्या घटनेने त्यांच्या धार्मिक भावना दुखावल्या गेल्या आहेत.

सलमान खानला उघड धमकी

२०१८ मध्ये कोर्टाच्या सुनावणीदरम्यान लॉरेन्स बिश्नोईने सलमान खानला जोधपूरमध्येच मारण्याची धमकी दिली होती. त्यानंतर सलमानने त्यांच्या समाजाच्या मंदिरात जाऊन माफी मागावी, अशी मागणीही त्याने केली होती.

एप्रिल २०२४ मध्ये सलमान खानच्या मुंबईतील घरावर गोळीबार झाला होता. त्याच वर्षी त्याचे जवळचे मित्र आणि माजी मंत्री बाबा सिद्दीकी यांची हत्या झाली, ज्यामुळे सुरक्षेची चिंता आणखी वाढली.

टायगर श्रॉफला धमकी का?

सलमान खानच्या जवळच्या लोकांना टार्गेट करण्याची धमकी बिश्नोई गँगने यापूर्वीच दिली होती. टायगर श्रॉफ आणि त्याचे वडील जॅकी श्रॉफ यांचे सलमान खानसोबत खूप चांगले संबंध आहेत, त्यामुळेच हा हल्ला झाल्याची चर्चा आहे. पण टायगर श्रॉफवरील हल्ल्याचं हेच कारण आहे, हे अद्याप अधिकृतपणे स्पष्ट झालेलं नाही.

पब्लिसिटी आणि खंडणीचे आरोप

प्रसिद्ध लोकांना धमक्या देऊन बातम्यांमध्ये राहणं, व्यावसायिक आणि चित्रपटसृष्टीत दहशत निर्माण करणं आणि खंडणी उकळण्याचा प्रयत्न करणं, हे गुन्हेगारी जगतातले जुनेच फंडे आहेत. बिश्नोई गँगवरही असेच आरोप होत आहेत.

टायगर श्रॉफवरील हल्ल्याच्या प्रकरणात पोलिसांच्या तपासानंतरच नेमकं कारण आणि आरोपींचा सहभाग स्पष्ट होईल. पण या घटनेमुळे बॉलिवूड स्टार्सची सुरक्षा आणि संघटित गुन्हेगारीविरोधातील कारवाईवर पुन्हा एकदा गंभीर चर्चा सुरू झाली आहे.