Chak De India: १९ वर्षांनंतरही लोक मला विद्या शर्मा म्हणूनच ओळखतात, अभिनेत्री विद्या म्हाळवदे झाली भावुक

'चक दे! इंडिया' रिलीज होऊन १९ वर्षं झाली असली तरी त्याची लोकप्रियता आजही कायम आहे. लोक आजही आपल्याला कॅप्टन विद्या शर्मा म्हणूनच ओळखतात, हे पाहून अभिनेत्री विद्या म्हाळवदे भारावून गेली आहे. तिने शाहरुख खानसोबत 'डॉन' चित्रपट पाहिल्याची एक खास आठवणही सांगितली.

'चक दे! इंडिया' चित्रपट प्रदर्शित होऊन तब्बल १९ वर्षं झाली, पण आजही या सिनेमाची आणि त्यातील पात्रांची लोकप्रियता पाहून अभिनेत्री विद्या म्हाळवदे भारावून जाते. शाहरुख खानच्या या सुपरहिट सिनेमाबद्दल बोलताना विद्याने ANI ला सांगितलं की, लोक आजही तिला कॅप्टन विद्या शर्मा म्हणून ओळखतात, यावर तिचा विश्वासच बसत नाही.

विद्या म्हणाली, "मला तर आश्चर्य वाटतं! त्या दिवशी मी इतकी भावुक झाले होते की मी सोशल मीडियावर एक पोस्ट टाकली. १९ वर्षं झाली, तरी लोक मला मेसेज करून आठवण करून देतात की, 'अरे, १९ वर्षं झाली!' खरं तर इतकी वर्षं झाल्यावर कधीकधी मीच विसरते की १८ वर्षं झाली की १९." 'चक दे! इंडिया'च्या १९ व्या वाढदिवसानिमित्त केलेल्या पोस्टबद्दल ती बोलत होती. इन्स्टाग्रामवर ही पोस्ट पाहा. विद्या एस म्हाळवदे (@vidyamalavade) यांनी शेअर केलेली पोस्ट. "आजच्या काळात जिथे लोकांना सिनेमांची नावंही लक्षात राहत नाहीत, तिथे मला लोक 'विद्या शर्मा, इंडिया' या नावाने ओळखतात. मला वाटतं, 'चक दे!' हा एका आशीर्वादासारखा आहे, जो भरभरून देतच राहतो," असंही ती म्हणाली.

SRK सोबतचा तो 'सररिअल' क्षण

विद्या म्हाळवदेने 'चक दे! इंडिया'च्या शूटिंगदरम्यान शाहरुख खानसोबतची एक खास आठवण सांगितली. ज्यावेळी शाहरुखचा 'डॉन' चित्रपट रिलीज झाला होता, तेव्हा त्याने सर्व मुलींसाठी एका स्पेशल स्क्रिनिंगचं आयोजन केलं होतं.

विद्याने आठवण सांगताना म्हटलं, "तो खूपच चांगला आहे. त्याने आम्हा सर्व मुलींसाठी स्क्रिनिंग ठेवलं होतं आणि मी अक्षरशः त्याच्या बाजूला बसून त्याचा सिनेमा पाहिला. तो अनुभव खूपच सररिअल होता, म्हणजे अविश्वसनीय! कारण मी विचार करत होते की, 'ओके, हा माणूस समोर स्क्रीनवर दिसतोय आणि प्रत्यक्ष माझ्या बाजूलाही बसलाय.' ते सगळं खरंच अद्भुत होतं."

आयुष्यभरासाठी जोडलेली नाती

या चित्रपटात भारतीय महिला हॉकी संघातील सदस्य बनलेल्या अभिनेत्रींमध्ये तयार झालेल्या नात्याबद्दलही विद्या बोलली. "खूप साऱ्या आठवणी आहेत! आम्ही सहा महिने शूटिंग केलं, पण त्याआधी सहा महिने एकत्र ट्रेनिंग करत होतो. म्हणजे जवळपास एक वर्ष आम्ही एकत्र होतो," तिने सांगितलं.

ती म्हणाली की, त्या काळात तयार झालेली मैत्री जवळपास दोन दशकांनंतरही कायम आहे. आजही त्या सगळ्या जणी एका ग्रुपद्वारे एकमेकांच्या संपर्कात आहेत आणि एकमेकींच्या आयुष्यात काय चाललंय यावर लक्ष ठेवून असतात. "आम्ही आजही एकमेकींच्या संपर्कात आहोत, कारण त्या एका वर्षात एक वेगळंच नातं तयार झालंय. आजही आम्हाला वाटतं की, 'अरे, आपण पुन्हा भेटायला हवं, पुन्हा बोलूया, एकत्र बसूया'," असं ती म्हणाली.

शिमित अमीन यांनी दिग्दर्शित केलेला 'चक दे! इंडिया' YRF च्या बॅनरखाली तयार झाला होता आणि आदित्य चोप्रा त्याचे निर्माते होते. या चित्रपटात शाहरुख खानने भारतीय महिला हॉकी संघाचे प्रशिक्षक कबीर खान यांची भूमिका साकारली होती.