Uorfi Javed: बलात्कारावर विनोद? कॉमेडियनवर भडकली उर्फी, म्हणाली 'तुमच्या टीममध्ये...'

कॉमेडीच्या नावाखाली आता कोणत्याही थराला जालं जातंय का? कॉमेडियन मधुर विरलीच्या एका जुन्या व्हिडिओमुळे सोशल मीडियावर मोठा वाद पेटला आहे. या व्हिडिओवर उर्फी जावेदही चांगलीच भडकलीये. या वादानंतर मधुरचं इन्स्टाग्राम अकाउंटही गायब झालंय. नेमकं काय आहे हे प्रकरण?

स्टँड-अप कॉमेडीच्या मर्यादांवरून पुन्हा एकदा मोठी चर्चा सुरू झाली आहे. कॉमेडियन मधुर विरलीचा एक जुना व्हिडिओ सोशल मीडियावर वेगाने व्हायरल होत आहे, ज्यात तो बलात्कारसारख्या गंभीर आणि संवेदनशील विषयावर विनोद करताना दिसतोय. हा व्हिडिओ समोर आल्यानंतर सोशल मीडियावर तीव्र प्रतिक्रिया उमटत आहेत. याच दरम्यान, रिॲलिटी शो स्टार आणि सोशल मीडिया इन्फ्लुएन्सर उर्फी जावेदनेही या प्रकरणावर उघडपणे नाराजी व्यक्त केली आहे. तिने केवळ मधुर विरलीलाच सुनावलं नाही, तर स्टँड-अप कॉमेडीच्या त्या वातावरणावरही प्रश्नचिन्ह निर्माण केलं आहे, जिथे अशा विनोदांना सामान्य मानलं जातं.

व्हायरल व्हिडिओमुळे वाद पेटला

सोशल मीडियावर व्हायरल झालेल्या व्हिडिओमध्ये मधुर विरली एका अत्यंत गंभीर गुन्ह्यावर विनोद करताना दिसला. व्हिडिओमधील काही कमेंट्सवर युजर्सनी तीव्र आक्षेप घेत याला असंवेदनशील म्हटलं आहे. व्हिडिओ व्हायरल होताच अनेक लोकांनी या कॉमेडियनवर टीका करण्यास सुरुवात केली.

उर्फी जावेदने मधुर विरलीच्या विनोदावर व्यक्त केली नाराजी

वाद वाढल्यानंतर उर्फी जावेदने इन्स्टाग्राम स्टोरीद्वारे आपली प्रतिक्रिया दिली. तिने लिहिलं, "आता आपण बलात्कारसारख्या घटनांवरही विनोद करणार आहोत का? ठीक आहे. पुरुष कॉमेडियनना माझी एक विनंती आहे की, कृपया तुमच्या टीममध्ये काही महिलांनाही घ्या, जेणेकरून तुमच्यात थोडा तरी संवेदनशीलपणा येईल." उर्फीची ही प्रतिक्रिया सोशल मीडियावर वेगाने व्हायरल होत असून अनेक लोकांनी तिच्या भूमिकेचं समर्थन केलं आहे.

उर्फी जावेदने स्टँड-अप कॉमेडी कल्चरवर उपस्थित केले प्रश्न

उर्फी जावेदने फक्त एका कॉमेडियनला लक्ष्य केलं नाही, तर तिने अशा वातावरणावरही टीका केली जिथे गंभीर विषयांवरील विनोदांना मनोरंजन म्हणून स्वीकारलं जातं. तिच्या मते, सार्वजनिक मंचावर सादर होणाऱ्या कंटेंटमध्ये सामाजिक जबाबदारी आणि संवेदनशीलपणा असणं गरजेचं आहे.

मधुर विरलीचं इन्स्टाग्राम अकाउंट गायब झाल्याने चर्चांना उधाण

या वादानंतर मधुर विरलीचं इन्स्टाग्राम अकाउंट आता दिसत नाहीये. रिपोर्ट्सनुसार, त्याचं अकाउंट हटवल्यामुळे किंवा डिलीट झाल्यामुळे सोशल मीडियावर चर्चांना आणखी जोर आला आहे. मात्र, या प्रकरणी मधुर विरलीकडून अद्याप कोणतंही स्पष्टीकरण आलेलं नाही. पण या प्रकरणामुळे सोशल मीडियावर दोन गट पडले आहेत. एका गटाचं म्हणणं आहे की, कॉमेडीच्या नावाखाली कोणत्याही संवेदनशील विषयाची चेष्टा करू नये. तर दुसरा गट अभिव्यक्ती स्वातंत्र्य आणि कॉमेडीच्या मर्यादांवर वेगळं मत मांडत आहे.

कोण आहे मधुर विरली?

मधुर विरली हा एक भारतीय कॉमेडियन, लेखक आणि यूट्यूबर आहे. त्याने IIT दिल्लीमध्ये शिकत असताना कॉलेजच्या ओपन-माइक इव्हेंट्समधून परफॉर्म करायला सुरुवात केली होती. हळूहळू, त्याने इंजिनिअर म्हणून काम करत असतानाच कॉमेडीच्या जगात पाऊल ठेवलं.