Amitabh Bachchan KBC: 'अमिताभ बच्चन यांना भेटायला आलो होतो', कसाबच्या दाव्यावर बिग बींची रिअ‍ॅक्शन

राजकुमार रावच्या 'प्रहार' सिनेमाच्या प्रमोशनसाठी उज्ज्वल निकम केबीसीमध्ये आले होते. यावेळी त्यांनी २६/११ चा दहशतवादी अजमल कसाबबद्दल एक मोठा खुलासा केला. तपासाची दिशा भरकटवण्यासाठी कसाबने आपण अमिताभ बच्चन यांना भेटायला आल्याचं खोटं सांगितलं होतं. हे ऐकून खुद्द बिग बींनाही धक्का बसला.

राजकुमार राव, वामिका गब्बी आणि प्रसिद्ध सरकारी वकील उज्ज्वल निकम नुकतेच 'कौन बनेगा करोडपती'च्या विशेष भागात दिसले. 'प्रहार: द अनटोल्ड स्टोरी ऑफ उज्ज्वल निकम' या आगामी सिनेमाच्या प्रमोशनसाठी ते या शोमध्ये आले होते. हा सिनेमा उज्ज्वल निकम यांच्या आयुष्यावर आणि त्यांनी लढलेल्या प्रसिद्ध खटल्यांवर आधारित आहे. या सिनेमात राजकुमार राव उज्ज्वल निकम यांची भूमिका साकारत आहे. २६/११ चा मुंबई दहशतवादी हल्ला, अजमल कसाबचा खटला आणि १९९३ चे मुंबई बॉम्बस्फोट यांसारख्या महत्त्वाच्या खटल्यांभोवती या सिनेमाची कथा फिरते. कोर्टातील त्यांचा कायदेशीर लढा, त्यांना आलेली आव्हानं आणि त्यांचं वैयक्तिक आयुष्य या सिनेमात पाहायला मिळणार आहे. वामिका गब्बी त्यांच्या पत्नी ज्योती निकम यांच्या भूमिकेत दिसणार आहे. अविनाश अरुण यांनी या सिनेमाचं दिग्दर्शन केलं आहे.

या शोदरम्यान उज्ज्वल निकम यांनी कसाबशी संबंधित अनेक किस्से सांगितले. २६/११ चा मुंबई हल्ला आणि त्यानंतरच्या कायदेशीर कारवाईवर चर्चा करताना निकम म्हणाले की, तपास यंत्रणांची दिशाभूल करण्यासाठी अजमल कसाबने अनेक खोटे दावे केले होते. आपल्याला २६/११ च्या हल्ल्यासाठी अटक झाली नसून, ६ नोव्हेंबरला जुहू चौपाटीवरून पकडण्यात आल्याचा दावा कसाबने केला होता. यावेळी निकम यांनी एक धक्कादायक खुलासा केला. कसाबने आपण अमिताभ बच्चन यांना भेटण्यासाठी मुंबईत आल्याचं खोटं सांगितलं होतं. हे ऐकून अमिताभ बच्चन यांनाही मोठा धक्का बसला. यावर प्रतिक्रिया देताना बिग बी म्हणाले की, जर तो माझ्या घरी आला असता, तर मी तिथून गेलो नसतो आणि त्याला तिथेच गोळ्या घातल्या असत्या.

चौकशीदरम्यान कसाबने केलेल्या इतर दाव्यांचाही निकम यांनी उल्लेख केला. कसाबने आपण अल्पवयीन असल्याचा आणि आपल्याला 'रॉ'ने (RAW) अटक केल्याचा दावा केला होता. पुढील कारवाई करण्यापूर्वी त्याचं वय सिद्ध करणं गरजेचं होतं, त्यामुळे या खटल्यात एक मोठं कायदेशीर आव्हान उभं राहिलं होतं, असं निकम यांनी सांगितलं.

२६/११ च्या हल्ल्याबद्दल...

२६ नोव्हेंबर २००८ रोजी समुद्रमार्गे मुंबईत आलेल्या १० दहशतवाद्यांनी अनेक ठिकाणी हल्ले केले. हा हल्ला सुमारे ६० तास चालला आणि २९ नोव्हेंबरच्या सकाळी संपला. सर्वोच्च न्यायालयाच्या नोंदीनुसार, या हल्ल्यात १६६ लोकांचा मृत्यू झाला आणि २३८ लोक जखमी झाले. मृतांमध्ये १८ पोलीस आणि सुरक्षा कर्मचारी, तसेच २६ परदेशी नागरिकांचा समावेश होता. या १० हल्लेखोरांपैकी अजमल अमीर कसाब हा एकमेव दहशतवादी होता ज्याला जिवंत पकडण्यात आलं. त्याला २७ नोव्हेंबर २००८ रोजी अटक करण्यात आली. उर्वरित नऊ दहशतवादी सुरक्षा दलांसोबतच्या चकमकीत मारले गेले.

या प्रकरणाच्या तपासात कसाबची अटक अत्यंत महत्त्वाची ठरली. सर्वोच्च न्यायालयाच्या निकालानुसार, या तपासात पोलिसांच्या चौकशीसोबतच कसाबचे जबाब, फॉरेन्सिक पुरावे, सीसीटीव्ही फुटेज आणि इतर पुराव्यांचा समावेश होता. हा हल्ला पाकिस्तानातून आखला गेला होता, असा निष्कर्ष न्यायालयाने काढला. कसाबवर देशाविरुद्ध युद्ध पुकारण्याचा कट रचणे, दहशतवादी कारवाया, हत्या, हत्येचा कट आणि शस्त्र बाळगण्यासह अनेक गंभीर आरोप ठेवण्यात आले होते.

दोषी आणि फाशीची शिक्षा

मे २०१० मध्ये मुंबईच्या विशेष न्यायालयाने त्याला दोषी ठरवून फाशीची शिक्षा सुनावली. फेब्रुवारी २०११ मध्ये बॉम्बे हायकोर्टानेही त्याची शिक्षा कायम ठेवली. त्यानंतर हे प्रकरण सर्वोच्च न्यायालयात पोहोचलं. २०१२ मध्ये सर्वोच्च न्यायालयाने कसाबचं अपील फेटाळून लावत त्याची फाशीची शिक्षा कायम ठेवली. त्यानंतर त्याचा दयेचा अर्जही फेटाळण्यात आला. अखेर २१ नोव्हेंबर २०१२ रोजी पुण्याच्या येरवडा तुरुंगात त्याला फाशी देण्यात आली.