Sooraj Pancholi: 'माझ्या शांतपणाचा गैरफायदा घेऊ नका'; जिया खान प्रकरणावर अखेर सोडलं मौन

जिया खान आत्महत्या प्रकरणात निर्दोष सुटलेला अभिनेता सूरज पांचोलीने इन्स्टाग्रामवर एक पोस्ट लिहून अखेर मौन सोडलं आहे. 'अर्धवट माहिती' पसरवणाऱ्या मीडियाला त्याने सुनावलं असून, १४ वर्षांची कायदेशीर लढाई ही पुराव्यांवर आधारित होती आणि यात कोणतेही 'अनुत्तरित प्रश्न' नाहीत, असं त्याने स्पष्ट केलं आहे.

अभिनेता सूरज पांचोली, ज्याची जिया खान आत्महत्या प्रकरणात विशेष सीबीआय कोर्टाने निर्दोष मुक्तता केली होती, त्याने आता इतक्या वर्षांनी या प्रकरणावर मौन सोडलं आहे. या कायदेशीर लढाईचा त्याच्या आयुष्यावर काय परिणाम झाला, हे त्याने सांगितलं आहे. रविवारी सूरजने इन्स्टाग्रामवर एक लांबलचक नोट शेअर केली. यात त्याने मीडिया आणि लोकांना आवाहन केलं आहे की, त्यांनी 'अर्धवट सत्य' पसरवू नये. कोर्टाने या प्रकरणात आधीच निर्णय दिला आहे, असंही तो म्हणाला.

'अनुत्तरित' प्रश्नांवरून सूरजचा मीडियाला सवाल

या प्रकरणात अजूनही काही 'प्रश्न अनुत्तरित' असल्याचं मीडिया रिपोर्ट्समध्ये म्हटलं जातंय. यावर सूरजने थेट सवाल केला आहे. आपल्या पोस्टमध्ये तो म्हणाला, "ज्या मीडिया पेजेसना वाटतं की काहीतरी 'अनुत्तरित' आहे, त्यांनी कृपया ते काय आहे हे स्पष्ट करावं आणि आपली माहिती अचूक असल्याची खात्री करावी. मी १४ वर्षांच्या कोर्ट ट्रायलमधून गेलो आहे. हा खटला तथ्य, पुरावे आणि कायद्याच्या आधारावर लढला गेला. माझी निर्दोष मुक्तता झाली आहे आणि कायदेशीर प्रक्रियेत कोणतेही 'अनुत्तरित प्रश्न' नाहीत. ज्यांना खरंच मत बनवण्याआधी तथ्य जाणून घ्यायचं आहे, त्यांच्यासाठी कोर्टाची सर्व कागदपत्रं आणि कार्यवाही सार्वजनिकरित्या उपलब्ध आहे," असं सूरजने लिहिलं आहे.

इन्स्टाग्रामवर ही पोस्ट पाहा

'या खटल्याने माझी विशी आणि तिशी दोन्ही घेतली'

या लांबलचक कायदेशीर लढाईचा त्याच्या आयुष्यावर झालेल्या परिणामाबद्दलही सूरज बोलला. तो म्हणाला की, ही '१४ वर्षांची कोर्ट ट्रायल' होती. ही ती वर्षे होती जेव्हा तो आपलं भविष्य घडवू शकला असता, पण त्याऐवजी त्याला स्वतःला निर्दोष सिद्ध करण्यातच ही वर्षे घालवावी लागली. तो पुढे म्हणाला, "पुढची १४ वर्षे मी स्वतःला निर्दोष सिद्ध करण्यासाठी लढत होतो. ही ती वर्षे होती ज्यात मी माझं आयुष्य घडवायला हवं होतं. पण त्याऐवजी, माझ्या विशीतला आणि तिशीतला मोठा काळ या खटल्याच्या ओझ्याखाली गेला. माझ्या मनात आणि हृदयात दररोज काय ओझं होतं, हे फक्त मलाच माहीत आहे."

'माझ्या शांत राहण्याचा अर्थ संधी समजू नका'

आपल्या नोटच्या शेवटी सूरजने म्हटलं आहे की, जिया खान आणि तिच्या खासगी आयुष्याबद्दल आदर असल्यामुळे तो इतकी वर्षे शांत राहिला. पण त्याच्या या शांत राहण्याचा अर्थ लोकांनी त्याच्याबद्दल काहीही लिहिण्याची संधी समजू नये. त्याने लिहिलं, "मी इतकी वर्षे शांत राहणं निवडलं, याचा अर्थ कुणालाही माझ्याबद्दल काहीही लिहिण्याचा अधिकार मिळत नाही. आदरापोटी, तिने (जियाने) माझ्यासोबत शेअर केलेल्या तिच्या वैयक्तिक त्रासाबद्दल किंवा तिच्या आयुष्यातील संघर्षांबद्दल मी कधीही सार्वजनिकपणे बोललो नाही. माझ्यासोबत इतकं सगळं होऊनही मी तिची प्रायव्हसी जपली. त्याबदल्यात मला फक्त तेवढाच न्याय आणि आदर हवा आहे."

२०१३ मध्ये अभिनेत्री जिया खानच्या मृत्यूनंतर सूरजवर आत्महत्येस प्रवृत्त केल्याचा आरोप ठेवण्यात आला होता. मात्र, विशेष सीबीआय कोर्टाने त्याला या प्रकरणात दोषी न ठरवता निर्दोष मुक्त केलं.