लग्नाच्या आदल्या दिवशी झाला होता मोठा वाद! पलाश-स्मृती प्रकरणात नवा खुलासा

Smriti Mandhana Controversy: पलाश मुच्छल आणि स्मृती मानधना यांचे लग्न मोडल्यानंतर ३ महिन्यांनी एक धक्कादायक खुलासा झाला आहे, जो स्मृतीचा बालपणीचा मित्र विद्यान मानेने केला आहे.

Smriti Mandhana Palash Muchhal Breakup: भारतीय महिला क्रिकेट टीम आणि रॉयल चॅलेंजर्स बंगळुरूची स्टार खेळाडू स्मृती मानधना आणि बॉलिवूड संगीतकार पलाश मुच्छल यांच्या लग्नाची गेल्या काही महिन्यांपासून चर्चा सुरू आहे. दोघांचे लग्न नोव्हेंबर २०२५ मध्ये होणार होते, पण लग्नाच्या आदल्या दिवशीच त्यांनी लग्न रद्द केले. यानंतर डिसेंबरमध्ये अचानक त्यांच्या नात्यात दुरावा आल्याची बातमी समोर आली. स्मृती-पलाशने सोशल मीडियावर निवेदन जारी करून लग्न रद्द केल्याची माहितीही दिली. मात्र, आता या प्रकरणात एक नवीन आणि धक्कादायक वळण आले आहे. स्मृतीचा बालपणीचा मित्र विद्यान माने याने पलाशवर गंभीर आरोप केले आहेत.

स्मृतीच्या मित्राने पलाशबद्दल काय सांगितले?

स्मृती मानधनाचा बालपणीचा मित्र विद्यान मानेने पलाश मुच्छलवर आरोप केला आहे की, तो लग्नाच्या आदल्या दिवशी दुसऱ्या महिलेसोबत आक्षेपार्ह स्थितीत आढळला होता. त्याने सांगितले की, तो लग्नाशी संबंधित एका कार्यक्रमात उपस्थित होता. त्यावेळी पलाश दुसऱ्या महिलेसोबत दिसला. या घटनेनंतर वातावरण खूप तणावपूर्ण झाले आणि प्रकरण खूप वाढले. त्याने असेही सांगितले की, जेव्हा पलाशला रंगेहाथ पकडले तेव्हा भारतीय महिला क्रिकेटपटूंनी त्याला चांगलाच चोप दिला होता.

स्मृतीच्या मित्रासोबत पलाशने केली फसवणूक

स्मृतीचा मित्र विद्यान मानेने असाही आरोप केला आहे की, पलाश मुच्छलने त्याची फसवणूक केली. त्याने पलाशला ४० लाख रुपये दिले होते, असा आरोप त्याने केला. पलाशने सांगितले होते की, त्याचा चित्रपट ६ महिन्यांत पूर्ण होईल आणि तो पैसे परत करेल, पण ना चित्रपट बनला ना पैसे परत मिळाले. लग्न रद्द झाल्यानंतर पलाशने आपला फोन उचलणेही बंद केले आहे, असे विद्यानचे म्हणणे आहे.

२३ नोव्हेंबरला होणार होते पलाश आणि स्मृतीचे लग्न

स्मृती मानधनाचे लग्न २३ नोव्हेंबर २०२५ रोजी महाराष्ट्रातील सांगली येथे होणार होते. पण लग्नापूर्वी स्मृतीचे वडील श्रीनिवास मानधना यांची प्रकृती बिघडल्याने त्यांना रुग्णालयात दाखल करण्यात आले. याच कारणामुळे लग्न पुढे ढकलण्याची चर्चा सुरुवातीला झाली होती, पण नंतर दोघांनी परस्पर संमतीने लग्न रद्द करण्याचा निर्णय घेतला. आता विद्यान मानेच्या आरोपांनंतर हे प्रकरण पुन्हा एकदा चर्चेत आले आहे, ज्यामध्ये त्याने पलाशवर अत्यंत गंभीर आरोप केले आहेत.