Ramayana Memes : 'रामायण'मधील 'मॉडर्न' लूकमुळे मीम्सचा पाऊस; शूर्पणखा, सीतेचे कपडे चर्चेत
सार
Ramayana Trailer : नितेश तिवारी यांच्या बहुप्रतिक्षित 'रामायण' सिनेमाच्या ट्रेलरवर नेटकऱ्यांनी विविध प्रतिक्रिया दिल्या आहेत. अनेकांनी सिनेमातील भव्य व्हिज्युअल्स आणि अभिनयाचं कौतुक केलंय, तर काहींनी शूर्पणखा, सीता आणि कैकेयी यांच्या कपड्यांवर, मेकअप आणि स्टाइलिंगवर बोट ठेवत मीम्सचा पाऊस पाडलाय.
मुंबई : नितेश तिवारी यांच्या बहुप्रतिक्षित 'रामायण' सिनेमाची पहिली झलक अखेर प्रेक्षकांना पाहायला मिळाली. गुरुवारी पहाटे ४.१५ वाजता (ब्रह्म मुहूर्तावर) सिनेमाचा भव्य ट्रेलर रिलीज झाला. यातून प्रेक्षकांना कलाकार, पात्रं आणि सिनेमाच्या व्हिज्युअल स्टाइलची ओळख झाली. ट्रेलर रिलीज होताच सोशल मीडियावर चर्चेला उधाण आलं. अनेकांनी सिनेमाचा भव्यपणा आणि व्हिज्युअल्सचं कौतुक केलं, तर काहींनी मात्र सिनेमातील स्त्री पात्रांच्या कपड्यांवर आणि स्टाइलिंगवर लक्ष केंद्रित केलं. काही तासांतच सोशल मीडियावर या लूकवरून मीम्स आणि कमेंट्सचा पूर आला.
शूर्पणखेचा लूक चर्चेचा विषय
शूर्पणखेच्या भूमिकेतील रकुल प्रीत सिंगचा लूक सर्वांच्या चर्चेचा विषय ठरला. काही प्रेक्षकांनी तिच्या कामाचं कौतुक केलं, तर सोशल मीडियावर लगेचच तिच्या लूकवरून जोक्स, मीम्स बनवायला सुरुवात केली. एका सोशल मीडिया युजरने तिला 'मॉडर्न शूर्पणखा' म्हटलं. तर दुसऱ्याने रकुल प्रीत सिंग आणि टीव्ही अभिनेता रवी दुबेची पत्नी सरगुन मेहता यांच्यातील साम्याबद्दल गंमतीशीर कमेंट केली. काही कमेंट्समध्ये थेट शूर्पणखेची स्टाइल त्रेतायुगाला साजेशी आहे का, यावर लक्ष केंद्रित केलं गेलं. एका युजरने विचारलं की, त्रेतायुगात महिला खरंच असे कपडे घालत असतील का, तर दुसऱ्याने हा लूक आजच्या काळातल्या एखाद्या सिनेमासाठी जास्त योग्य वाटतो, अशी गंमतीशीर टीका केली.
सीता आणि कैकेयीच्या लूकवरही प्रश्नचिन्ह
फक्त शूर्पणखाच नाही, तर सीतेच्या भूमिकेतील साई पल्लवी आणि कैकेयीच्या भूमिकेतील लारा दत्ता यांच्या लूकवरही नेटकऱ्यांनी कमेंट्स केल्या. विशेषतः त्यांच्या साड्या, ब्लाउज, हेअरस्टाइल आणि मेकअपवर अनेकांनी प्रश्नचिन्ह उपस्थित केलं. अनेक युजर्सनी त्रेतायुगातील कथेसाठी ही स्टाइल योग्य आहे का, असा सवाल विचारला. काहींनी तर या लूकची तुलना प्रसिद्ध टीव्ही मालिकांमधील कपड्यांशी केली. एका प्रेक्षकाने म्हटलं की, ट्रेलर प्रभावी असला तरी साडीची स्टाइल एकता कपूरच्या मालिकेसारखी वाटते. त्रेतायुग दाखवत आहात की त्याचं आधुनिक रूप, असा प्रश्नही काहींनी विचारला.
सगळीकडूनच टीका नाही
या टीकेनंतरही, ट्रेलरला मिळालेली प्रतिक्रिया पूर्णपणे नकारात्मक नव्हती. अनेक प्रेक्षकांना ट्रेलर आवडला असून ते सिनेमा पाहण्यासाठी उत्सुक आहेत. काहींनी ट्रेलरमधील भव्यता आणि कलाकारांच्या अभिनयाचं कौतुक केलं. तर काहींच्या मते, शूर्पणखेचा लूक सगळ्यांत जास्त प्रभावी ठरला. अनेक जणांनी कलाकारांनी उच्चारलेले संवाद आणि ट्रेलरच्या एकूण लूक-फीलची प्रशंसा केली.
प्रेक्षकांकडून पौराणिक चित्रपटाच्या प्रदर्शनाची आतुरता
या संमिश्र प्रतिक्रियांमुळे 'रामायण'बद्दलची उत्सुकता आणखी वाढली आहे. हा सिनेमा सध्याच्या सर्वात जास्त चर्चेत असलेल्या पौराणिक प्रोजेक्टपैकी एक आहे. ट्रेलरवरून हे स्पष्ट होतंय की, प्रेक्षक या दिवाळीत, म्हणजेच ८ नोव्हेंबर रोजी सिनेमाच्या रिलीजची आतुरतेने वाट पाहत आहेत. प्रेक्षक केवळ कथा आणि अभिनयासाठीच नाही, तर मेकर्सनी प्राचीन जगाला पडद्यावर कसं सादर केलं आहे, हे पाहण्यासाठीही उत्सुक असतील. सध्या तरी, ट्रेलरने आपलं काम चोख बजावल्याची चर्चा आहे.