Ramayana Cast Fees : 'रामायण'साठी कलाकारांची फी किती? 'या' अभिनेत्याने संपूर्ण मानधन कॅन्सरग्रस्तांना केलं दान

नितेश तिवारी दिग्दर्शित 'रामायण' चित्रपटातील कलाकारांच्या मानधनाचे आकडे समोर आले आहेत. यात रणबीर कपूरने सर्वाधिक फी घेतली आहे, तर यश नफ्यातील वाटा घेणार आहे.

मुंबई : भारतीय चित्रपटसृष्टीतील बहुचर्चित सिनेमांपैकी एक म्हणजे दिग्दर्शक नितेश तिवारी यांचा 'रामायण'. तगडी स्टारकास्ट आणि भव्य बजेटमुळे हा सिनेमा सध्या चांगलाच चर्चेत आहे. बॉलिवूड आणि साऊथचे अनेक मोठे स्टार्स या सिनेमात एकत्र दिसणार आहेत. आता या सिनेमातील कलाकारांच्या मानधनाचे आकडे समोर आले असून, ते वाचून तुम्हीही थक्क व्हाल.

CineAIx या एक्स (X) अकाऊंटवर शेअर केलेल्या माहितीनुसार, 'रामायण'मधील प्रमुख कलाकारांनी किती फी घेतली आहे, याची यादी खालीलप्रमाणे आहे.

रणबीर कपूर

बॉलिवूड अभिनेता रणबीर कपूर 'रामायण'मध्ये प्रभू श्रीरामांची भूमिका साकारत आहे. या भूमिकेसाठी त्याने तब्बल ७५ कोटी रुपये मानधन घेतल्याची चर्चा आहे. या आकड्यानुसार, रणबीर या सिनेमातील सर्वाधिक मानधन घेणारा अभिनेता ठरला आहे.

यश

पॅन इंडिया स्टार यश या सिनेमात रावणाच्या भूमिकेत दिसणार आहे. पण, या भूमिकेसाठी त्याने एकही रुपया फी घेतलेली नाही. यश या सिनेमाचा सहनिर्माता असून, नमित मल्होत्रा यांच्यासोबत तो निर्मितीची जबाबदारी सांभाळत आहे. त्यामुळे बॉक्स ऑफिसवर सिनेमा जेवढी कमाई करेल, त्यातील नफ्याचा एक मोठा वाटा यशला मिळणार आहे.

साई पल्लवी

नितेश तिवारी यांच्या दोन भागांत येणाऱ्या या 'रामायण'मध्ये साई पल्लवी सीतेची भूमिका साकारत आहे. या भूमिकेसाठी तिने ६ कोटी रुपये मानधन घेतल्याचं समजतंय. यामुळे ती सिनेमातील सर्वाधिक मानधन घेणाऱ्या अभिनेत्रींच्या यादीत आघाडीवर आहे.

रवी दुबे

छोट्या पडद्यावरील लोकप्रिय अभिनेता रवी दुबे या सिनेमात श्रीरामांचा भाऊ, म्हणजेच लक्ष्मणाची भूमिका साकारणार आहे. या भूमिकेसाठी त्याने ३ कोटी रुपये फी घेतल्याची माहिती आहे.

सनी देओल

बॉलिवूडचा अ‍ॅक्शन स्टार सनी देओल 'रामायण'मध्ये हनुमानाची भूमिका साकारत आहे. या दमदार भूमिकेसाठी त्याने २० कोटी रुपये मानधन घेतल्याचं बोललं जात आहे.

रकुल प्रीत सिंग

अभिनेत्री रकुल प्रीत सिंग या सिनेमात शूर्पणखेच्या भूमिकेत दिसणार आहे. रिपोर्ट्सनुसार, या भूमिकेसाठी तिने १.५० कोटी रुपये मानधन घेतलं आहे.

विवेक ओबेरॉय

अभिनेता विवेक ओबेरॉय या सिनेमात शूर्पणखेचा नवरा 'विद्युज्जिह्व' याची भूमिका साकारत आहे. विशेष म्हणजे, या भूमिकेसाठी त्याने स्वतःसाठी एकही रुपया घेतलेला नाही. आपली संपूर्ण फी कॅन्सरग्रस्त मुलांच्या उपचारासाठी दान करावी, अशी विनंती त्याने निर्मात्यांना केली आहे.

लारा दत्ता

अभिनेत्री लारा दत्ता 'रामायण'मध्ये राणी कैकयीच्या भूमिकेत दिसणार आहे. या भूमिकेसाठी तिने फक्त २५ लाख रुपये मानधन घेतल्याची चर्चा आहे. त्यामुळे ती या सिनेमातील सर्वात कमी मानधन घेणारी कलाकार ठरली आहे.

एकंदरीत, 'रामायण'च्या स्टारकास्टच्या मानधनाचे हे आकडे चाहत्यांमध्ये प्रचंड उत्सुकता निर्माण करत आहेत. पण, हे आकडे फक्त रिपोर्ट्सवर आधारित असून, चित्रपट संघ किंवा कलाकारांनी अद्याप याला अधिकृत दुजोरा दिलेला नाही, हे लक्षात असू द्या.