''मी एक वेश्या असल्यासारखं वाटतंय,'' Miss England ने Miss World स्पर्धेतून घेतली माघार

मिस वर्ल्ड स्पर्धेतील स्पर्धकांना विक्रीच्या वस्तूंप्रमाणे वागवले जात असल्याचा आरोप करत मिस इंग्लंड स्पर्धेतून बाहेर पडली आहे. मध्यमवयीन प्रायोजकांसोबत बसवून त्यांचे आभार मानण्यास सांगितले जात असल्याचाही आरोप तिने केला आहे. 

हैदराबाद: तेलंगणामध्ये सुरू असलेल्या मिस वर्ल्ड स्पर्धेच्या आयोजकांवर गंभीर आरोप करत मिस इंग्लंड स्पर्धेतून बाहेर पडली आहे. मिस इंग्लंड मिल्ला मॅगी हिने स्पर्धेतून माघार घेतल्याचे जाहीर केले. स्पर्धकांना प्रदर्शनातील वस्तूंप्रमाणे वागवले जात असल्याचा आरोप तिने केला. आयोजक स्पर्धकांना विक्रीच्या वस्तू समजत असल्याचेही तिने म्हटले आहे. मध्यमवयीन प्रायोजकांसोबत बसवून त्यांचे आभार मानण्यास सांगितले जात असल्याचाही गंभीर आरोप मिल्लाने केला आहे.

प्रायोजकांना खूश करण्यासाठी दोन स्पर्धकांना एका हॉलमध्ये बसवले जात असे. त्यांना प्रायोजकांचे आभार मानायला सांगितले जात असे, असा आरोपही तिने केला. बुद्धिमत्तेचीही परीक्षा होईल असे वाटत होते, पण खेळण्यातील माकडासारखे बसावे लागले, अशी खंतही मॅगीने व्यक्त केली. वैयक्तिकरित्या तिथे राहणे शक्य नसल्याने स्पर्धेतून माघार घेतल्याचे तिने सांगितले. 'मी एक वेश्या आहे असे मला वाटले', असेही तिने 'द सन' वृत्तपत्राला दिलेल्या मुलाखतीत म्हटले आहे.

दरम्यान, आयोजकांनी हे आरोप फेटाळून लावले आहेत. वैयक्तिक कारणांमुळे ती परत जात असल्याचे तिने सांगितल्याचे आयोजकांनी म्हटले आहे. सध्या तेलंगणामध्ये सुरू असलेल्या मिस वर्ल्ड २०२५ स्पर्धेतून मिस इंग्लंड २०२४ मिल्ला मॅगी हिने माघार घेतली आहे. राज्याचा जागतिक स्तरावर प्रचार करण्यासाठी तेलंगणा सरकार मोठ्या थाटामाटात आयोजित करत असलेली ही आंतरराष्ट्रीय मिस वर्ल्ड स्पर्धा सतत वादाच्या भोवऱ्यात सापडत आहे. रामाप्पा मंदिराच्या भेटीदरम्यान स्पर्धकांचे पाय धुतल्याच्या वादानंतर आता स्पर्धक माघार घेतल्याने पुन्हा एकदा वाद निर्माण झाला आहे. ७ मे रोजी हैदराबादला आलेली २४ वर्षीय मिल्ला १६ मे रोजी ब्रिटनला परतली.