
Madhuri Dixit Deepfake : बॉलिवूडची 'धक-धक गर्ल' माधुरी दीक्षित सध्या एका व्हिडिओमुळे चर्चेत आली आहे. सोशल मीडियावर तिचा एक व्हिडिओ तुफान व्हायरल होतोय, ज्यात ती एका सार्वजनिक कार्यक्रमात आक्षेपार्ह ड्रेस घालून आल्याचा दावा केला जातोय. हा व्हिडिओ पाहून तिचे चाहते चकित झाले आणि याच्या खरेपणावर प्रश्न विचारू लागले. पण, अनेक रिपोर्ट्स आणि युझर्सच्या मते हा व्हिडिओ खरा नसून, तो AI च्या मदतीने तयार केलेला डीपफेक आहे.
वकील शोनी कपूर यांनी हा व्हिडिओ X वर शेअर केल्यावर हे प्रकरण आणखी तापलं. यावर पत्रकार जयदीप पांडे यांनी उत्तर देत ही क्लिप खोटी असल्याचं स्पष्ट केलं. 'हा व्हिडिओ आर्टिफिशियल इंटेलिजन्स (AI) वापरून बनवला आहे. ऑनलाइन काहीही शेअर करण्यापूर्वी त्याची सत्यता तपासा, कारण चुकीच्या पोस्टमुळे काही मिनिटांत गैरसमज आणि राग पसरू शकतो,' असं आवाहन त्यांनी लोकांना केलं.
इतरही अनेक युझर्सनी हा व्हिडिओ तपासून तो डीपफेक असल्याचं सांगितलं. AI टूल्समुळे खोट्या व्हिडिओलाही अगदी खरं भासवता येतं, त्यामुळे अशा गोष्टी ओळखणं किती कठीण झालंय, हे या घटनेतून पुन्हा एकदा समोर आलं आहे.
विशेष म्हणजे, माधुरी दीक्षितने १० मार्च, २०२६ रोजी याच कार्यक्रमाचे फोटो तिच्या सोशल मीडिया अकाउंटवर शेअर केले होते. या फोटोंमध्ये तिने तोच गाऊन घातला आहे, जो व्हायरल क्लिपमध्ये दिसतोय. पण, मूळ फोटोंमध्ये तिचा ड्रेस खूपच सुंदर आणि शालीन दिसतोय, तर व्हायरल व्हिडिओमध्ये तो आक्षेपार्ह दिसावा यासाठी बदलण्यात आला आहे. या तुलनेनंतर, अभिनेत्रीची प्रतिमा खराब करण्यासाठी मूळ फोटोंमध्ये फेरफार करून हा दिशाभूल करणारा व्हिडिओ बनवण्यात आल्याचं बहुतेक लोकांचं मत आहे.
माधुरी दीक्षित ही डीपफेक टेक्नॉलॉजीची शिकार झालेली काही पहिली सेलिब्रिटी नाही. गेल्या काही वर्षांत रश्मिका मंदाना, आलिया भट्ट, कतरिना कैफ, शाहरुख खान, सलमान खान, जान्हवी कपूर आणि सारा अली खान यांसारख्या अनेक बॉलिवूड कलाकारांना याचा सामना करावा लागला आहे. सध्या तरी माधुरीने या व्हायरल व्हिडिओवर कोणतीही प्रतिक्रिया दिलेली नाही.