Pradeep Rawat: 'लगान'च्या 'देवा'ला अखेरचा निरोप; आमिर खानसह कलाकारांना अश्रू अनावर

ज्येष्ठ अभिनेते प्रदीप सिंह रावत यांचं कर्करोगामुळे निधन झालं. त्यांच्या अंत्यसंस्काराला 'लगान' सिनेमातील सहकलाकार आमिर खानसह अनेक जण उपस्थित होते. यशपाल शर्मा, दया शंकर पांडे आणि इतर कलाकारांनी त्यांच्या आठवणींना उजाळा देत भावूक श्रद्धांजली वाहिली.

ज्येष्ठ अभिनेते प्रदीप सिंह रावत यांच्या अंत्यसंस्काराला 'लगान' सिनेमाची संपूर्ण टीम पोहोचली होती. आमिर खान, यशपाल शर्मा, दया शंकर पांडे, राजेंद्र गुप्ता आणि दिग्दर्शक आशुतोष गोवारीकर यांनी बुधवारी संध्याकाळी प्रदीप रावत यांना अखेरचा निरोप दिला. 'लगान'मध्ये देवा सिंग सोढी यांची भूमिका साकारणाऱ्या प्रदीप रावत यांना निरोप देताना हे सर्वजण खूप भावूक झाले होते. आमिर खानने प्रदीप यांच्या कुटुंबीयांची भेट घेऊन त्यांचं सांत्वन केलं.

सहकाऱ्यांनी वाहिली भावूक श्रद्धांजली

अंत्यसंस्कारानंतर अनेक कलाकारांनी ANI सोबत बोलताना प्रदीप यांच्या आठवणींना उजाळा दिला. यशपाल शर्मा म्हणाले, "माझ्याकडे शब्दच नाहीत. भगवान उनकी आत्मा को शांती दे. ते आमच्या आठवणींमध्ये नेहमी जिवंत राहतील."

प्रदीप रावत यांचं मंगळवारी संध्याकाळी मुंबईतील एका रुग्णालयात कर्करोगाशी झुंज देताना निधन झालं. दिग्दर्शक अशोक पंडित यांनी दुःख व्यक्त करताना म्हटलं, "प्रदीप रावत एक खूप चांगले व्यक्ती आणि एक उत्तम अभिनेते होते. त्यांचं जाणं हे आपल्या इंडस्ट्रीचं मोठं नुकसान आहे. त्यांचा आत्मविश्वास, सकारात्मकता आणि प्रचंड ऊर्जा त्यांना इतरांपेक्षा वेगळं ठरवायची. त्यांना कॅन्सर आहे, हे त्यांनी कधीच सांगितलं नाही. खरं तर, तीन-चार महिन्यांपूर्वीच आमचं बोलणं झालं होतं, त्यामुळे ते या आजाराशी लढत होते हे ऐकून मला मोठा धक्का बसला."

अभिनेते सुरेंद्र पाल हे देखील प्रदीप यांच्या अंत्यसंस्काराला उपस्थित होते. ते म्हणाले, "माझं आणि प्रदीप यांचं खूप जवळचं नातं होतं. आम्ही एकाच बिल्डिंगमध्ये राहायचो. ते फक्त एक उत्कृष्ट अभिनेतेच नव्हते, तर एक चांगला माणूसही होते. त्यांनी त्यांच्या करिअरमध्ये अनेक अविस्मरणीय भूमिका साकारल्या, पण 'गजनी'मधील त्यांची भूमिका सर्वात जास्त गाजली आणि आजही लोकांच्या लक्षात आहे."

दया शंकर पांडे यांनी सांगितलं की, त्यांनी प्रदीप यांच्यासोबत जास्त काम केलं नसलं तरी, २६ वर्षांपूर्वी 'लगान'च्या सेटवर त्यांच्यात एक खास नातं तयार झालं होतं. ते प्रदीप यांना मोठ्या भावाप्रमाणे मानायचे आणि त्यांच्याबद्दल खूप आदर होता.

राजेंद्र गुप्ता हे देखील प्रदीप यांच्या निधनाने खूप दुःखी झाले आहेत. ते म्हणाले, "त्यांचं जाणं खूप दुःखद आहे. ते एक चांगला माणूस आणि प्रतिभावान अभिनेते होते. त्यांची उणीव अनेकांना भासेल."

ज्येष्ठ अभिनेते रझा मुराद म्हणाले, "इंडस्ट्रीने एक जबरदस्त कलाकार गमावला आहे, मी एक जवळचा मित्र गमावला आहे आणि जगाने एक सज्जन माणूस गमावला आहे. त्यांनी केवळ त्यांची प्रतिभा, समर्पण आणि कठोर परिश्रमाच्या जोरावर प्रचंड आदर आणि ओळख मिळवली. ते एक अद्भुत व्यक्ती होते."

अली खान यांनी 'सरफरोश'मध्ये प्रदीप यांच्यासोबत काम केल्याची आठवण सांगितली. ते म्हणाले, "ते एक उत्तम व्यक्ती होते, ज्यांच्या चेहऱ्यावर नेहमी हसू असायचं. आम्ही एकत्र जास्त काम केलं नाही, पण आमची ओळख आणि नातं खूप जुनं आहे."

प्रदीप रावत यांची गाजलेली कारकीर्द

प्रदीप रावत ७४ वर्षांचे होते. त्यांच्या पश्चात पत्नी कल्याणी रावत आणि मुलगा विक्रमादित्य रावत आहेत.

भारतीय चित्रपटसृष्टीतील एक प्रसिद्ध चेहरा असलेले अभिनेते प्रदीप रावत हे हिंदी, तेलुगू आणि तमिळ सिनेमांमधील त्यांच्या भूमिकांसाठी ओळखले जातात. 'सरफरोश', 'लगान', 'Sye' (तेलुगू), 'नायक' (तेलुगू) आणि 'गजनी' यांसारख्या सिनेमांमधील त्यांच्या कामाची प्रेक्षकांना नेहमी आठवण राहील.

विकी कौशलच्या 'छावा' या आगामी सिनेमातही त्यांनी काम केलं होतं. यात त्यांनी येसाजी कंक यांची भूमिका साकारली होती.