Kalki 2 : नाग अश्विनने दिली मोठी अपडेट, शूटिंग कधी सुरू होणार?

'कल्की २८९८ एडी पार्ट २' च्या शूटिंगची चाहते आतुरतेने वाट पाहत आहेत. दिग्दर्शक नाग अश्विनने नुकतंच सांगितलंय की, ऑक्टोबरमध्ये याच्या शूटिंगला सुरुवात होईल. तसंच, सिनेमा कधी रिलीज होणार, यावरही त्याने मोठी अपडेट दिली आहे.

मुंबई : 'कल्की २८९८ एडी पार्ट २' ची वाट पाहणाऱ्या चाहत्यांसाठी एक मोठी बातमी आहे. या बहुचर्चित सिक्वेलचं शूटिंग ऑक्टोबर २०२६ च्या मध्यावर सुरू होणार असल्याची माहिती दिग्दर्शक नाग अश्विनने दिली आहे.

'व्हरायटी इंडिया'शी बोलताना अश्विनने सांगितलं की, मुख्य कलाकारांच्या तारखा आता फायनल झाल्या आहेत. कमल हासन आणि अमिताभ बच्चन यांचे काही सीन्स आधीच शूट झाले आहेत. आता टीम फक्त प्रभासच्या तारखांची वाट पाहत आहे.दिग्दर्शकाच्या मते, २०२७ च्या मध्यापर्यंत शूटिंग सुरू ठेवण्याचा प्लॅन आहे. शूटिंग पूर्ण झाल्यावर आणि पोस्ट-प्रॉडक्शनचं काम मार्गी लागल्यावरच रिलीज डेटबद्दल चर्चा केली जाईल, असंही त्याने स्पष्ट केलं.

२०२८ मध्ये रिलीज होण्याची शक्यता

अद्याप अधिकृत रिलीज डेट जाहीर झालेली नसली तरी, २०२८ मध्ये प्रेक्षकांना हा सिक्वेल थिएटरमध्ये पाहता येईल, असा अंदाज नाग अश्विनने वर्तवला आहे.दिग्दर्शकाच्या बोलण्यावरून हे स्पष्ट होतंय की, रिलीज डेट ठरवण्याआधी मेकर्सचं पूर्ण लक्ष शूटिंग पूर्ण करण्यावर आहे. पहिल्या भागाची आणि सिक्वेलची भव्यता पाहता, शूटिंग संपल्यानंतर पोस्ट-प्रॉडक्शनचं कामही खूप महत्त्वाचं असणार आहे.सध्या तरी ऑक्टोबरमध्ये मुख्य शूटिंग सुरू करणं आणि २०२७ च्या मध्यापर्यंत ते पूर्ण करणं, हेच टीमचं मुख्य टार्गेट आहे.

'कल्की २८९८ एडी'ला दोन राष्ट्रीय पुरस्कार

७२ व्या राष्ट्रीय चित्रपट पुरस्कारांमध्ये 'कल्की २८९८ एडी'ने दोन पुरस्कार पटकावले आहेत. या चित्रपटाला 'सर्वोत्कृष्ट लोकप्रिय चित्रपट' (Best Popular Film Providing Wholesome Entertainment) हा पुरस्कार मिळाला. तर, नितीन जिहानी चौधरी यांना 'सर्वोत्कृष्ट प्रॉडक्शन डिझाईन'चा पुरस्कार मिळाला.या यशाबद्दल बोलताना अश्विन म्हणाला की, या पुरस्कारांमुळे खूप सन्मानित झाल्यासारखं वाटतंय. सायन्स फिक्शन आणि भारतीय संस्कृतीचा मेळ घालत जास्तीत जास्त प्रेक्षकांपर्यंत पोहोचण्याचा या चित्रपटाचा प्रयत्न होता, असंही त्याने आवर्जून सांगितलं.

जून २०२४ मध्ये रिलीज झालेल्या 'कल्की २८९८ एडी'मध्ये प्रभास, अमिताभ बच्चन, कमल हासन आणि दीपिका पदुकोण यांच्या मुख्य भूमिका होत्या. या सिनेमाने जगभरात बॉक्स ऑफिसवर बक्कळ कमाई केली आणि सिक्वेलसाठी अनेक प्रश्न अनुत्तरित ठेवून चित्रपटाचा शेवट झाला.

'कल्की २' मध्ये दीपिका पदुकोण परतणार का, याचीही खूप चर्चा होती. पण, ती या सिक्वेलचा भाग नसेल, असं वैजयंती मुव्हीजने आधीच जाहीर केलं आहे. त्यानंतर या प्रोजेक्टमध्ये सई पल्लवीची एन्ट्री होणार असल्याच्या बातम्या आल्या. मात्र, जोपर्यंत अधिकृत घोषणा होत नाही, तोपर्यंत तिच्या भूमिकेबद्दलच्या बातम्या केवळ अफवाच मानाव्या लागतील.