John Abraham: आता क्रिकेटच्या मैदानातही जॉन अब्राहमची एन्ट्री, युरोपियन T20 लीगमध्ये खरेदी केला संघ!

अभिनेता जॉन अब्राहम आता क्रिकेटच्या मैदानात उतरला आहे. त्याने आयसीसी मान्यताप्राप्त युरोपियन T20 प्रीमियर लीगमध्ये 'रॉटरडॅम डॉकर्स' संघ खरेदी केला असून, मुंबईत संघाच्या जर्सीचं अनावरण केलं. जॉन्टी ऱ्होड्स आणि फाफ डू प्लेसिस हे त्याचे भागीदार आहेत.

बॉलिवूडचा 'अ‍ॅक्शन हिरो' जॉन अब्राहम आता क्रिकेटच्या जगातही उतरला आहे. आंतरराष्ट्रीय क्रिकेट परिषदेच्या (ICC) मान्यतेने सुरू होणाऱ्या युरोपियन T20 प्रीमियर लीगच्या (ETPL) पहिल्या सीझनमध्ये तो एका संघाचा सह-मालक बनला आहे. मंगळवारी मुंबईत झालेल्या एका कार्यक्रमात जॉन आणि दक्षिण आफ्रिकेचा माजी क्रिकेटर जॉन्टी ऱ्होड्स यांनी त्यांच्या 'रॉटरडॅम डॉकर्स' या संघाच्या जर्सीचं अनावरण केलं.

'योग्य वेळी, योग्य ठिकाणी आलोय'

यावेळी मीडियाशी बोलताना जॉनने क्रिकेटबद्दलचं आपलं प्रेम व्यक्त केलं. तो म्हणाला, "माझ्यासारख्या व्यक्तीसाठी या लीगमध्ये एक मोठी संधी आहे. ICC मान्यताप्राप्त अशा स्पर्धेचा भाग होताना मला खूप आनंद होतोय. मला खेळ आवडतात, कोणताही खेळ असो. त्यामुळे या लीगशी जोडला गेल्याचा मला अभिमान आहे. मला वाटतं की मला योग्य भागीदार मिळाले आहेत आणि आमचा संघ खूप मजबूत आहे. ही लीग खूप महत्त्वाची आहे आणि त्याला ICC चा पाठिंबा आहे, ही सर्वात मोठी गोष्ट आहे. त्यामुळे मी योग्य वेळी, योग्य ठिकाणी आहे असं मला वाटतं."

जर्सीचं अनावरण आणि Fireflies.ai सोबत भागीदारी

मुंबईत झालेल्या या कार्यक्रमात संघाचे सह-मालक जॉन्टी ऱ्होड्स आणि जॉन अब्राहम, संस्थापक आणि व्यवस्थापकीय संचालक मधुकर श्री आणि Fireflies.ai चे सह-संस्थापक आणि सीईओ कृष्ण रामिनेनी उपस्थित होते. यावेळी फ्रँचायझीने Fireflies.ai ला आपला अधिकृत जर्सी पार्टनर म्हणून घोषित केलं. रामिनेनी हे रॉटरडॅम डॉकर्समध्ये संस्थापक गुंतवणूकदार म्हणून सामील झाले आहेत. ETPL च्या प्रसिद्धीपत्रकानुसार, या भागीदारीमुळे क्रिकेट, तंत्रज्ञान आणि नावीन्य एकत्र आलं आहे.

रॉटरडॅम डॉकर्सचा संघ तगडा

प्रसिद्धीपत्रकानुसार, रॉटरडॅम डॉकर्स संघाची पहिली मॅच २६ ऑगस्टला वूरबर्गमध्ये ॲमस्टरडॅम फ्लेम्स विरुद्ध होणार आहे. जॉन्टी ऱ्होड्स, जॉन अब्राहम आणि फाफ डू प्लेसिस हे या संघाचे सह-मालक आहेत. दक्षिण आफ्रिकेचा माजी कर्णधार डू प्लेसिस संघाचं नेतृत्व करेल. संघात आंतरराष्ट्रीय अनुभव आणि डच टॅलेंटचा उत्तम मिलाफ आहे. हेनरिक क्लासेन, ॲनरिक नॉर्खिया, लोगन वॅन बीक आणि रुडॉल्फ वॅन डर मर्व यांसारखे T20 चे मोठे खेळाडू संघात आहेत. सोबतच नेदरलँड्सचे उदयोन्मुख खेळाडूही दिसतील.

ETPL च्या पहिल्या सीझनबद्दल...

ETPL चा पहिला सीझन २६ ऑगस्ट ते २० सप्टेंबर २०२६ या काळात खेळवला जाईल. हे सामने नेदरलँड्समधील वूरबर्ग आणि आयर्लंडमधील डब्लिन येथे होणार आहेत. यात एकूण सहा शहरांवर आधारित फ्रँचायझी संघ सहभागी होतील आणि युरोपियन T20 प्रीमियर लीगचे पहिले चॅम्पियन बनण्यासाठी लढतील.