Imran Khan Notice : 'भारत सोडा' नोटीसवर किरण राव भडकली, इम्रान खान हायकोर्टात जाणार

मुंबई पोलिसांनी अभिनेता इम्रान खानला 'भारत सोडा' नोटीस बजावली आहे. तो अमेरिकन नागरिक असूनही आंदोलनात सहभागी झाल्याने ही कारवाई झाली. यावर किरण रावने संताप व्यक्त केला असून, इम्रान आता हायकोर्टात धाव घेणार आहे.

मुंबई : मुंबई पोलिसांनी अभिनेता इम्रान खानला थेट 'भारत सोडा' अशी नोटीस बजावली आहे. इम्रान हा किरण रावचा पूर्वाश्रमीचा नवरा आमिर खानचा भाचा आहे. ऑगस्ट क्रांती मैदानात सीजेपी (CJP) ने पुकारलेल्या आंदोलनात तो सहभागी झाला होता. या कारवाईवर आता किरण रावने संताप व्यक्त केला आहे. तिने इन्स्टाग्राम स्टोरीवर एक पोस्ट शेअर केलीय. यात इम्रानला ऑक्टोबर अखेरपर्यंत देश सोडण्यास सांगितल्याचा उल्लेख आहे. यावर प्रतिक्रिया देताना किरणने लिहिलंय, "वा, आता मुंबई पोलीस?"

इम्रान खान हायकोर्टात जाणार

दुसरीकडे, इम्रान खान या 'भारत सोडा' नोटीस विरोधात मुंबई उच्च न्यायालयात (Bombay High Court) धाव घेणार आहे. त्याच्या कायदेशीर टीमने एएनआयला (ANI) ही माहिती दिली. वकिलांनी दिलेल्या माहितीनुसार, इम्रान पुढच्या आठवड्यात हायकोर्टात अपील दाखल करेल. तो नेमक्या कोणत्या मुद्द्यांवर आव्हान देणार, याची सविस्तर माहिती अद्याप समोर आलेली नाही.

पोलिसांची कारवाई आणि अटक

मुंबई पोलिसांनी इम्रानला २८ ऑक्टोबरपर्यंत देश सोडण्याचे आदेश दिले आहेत. रिपोर्ट्सनुसार, इम्रान खानकडे अमेरिकेचा पासपोर्ट आहे. मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी मुंबईच्या ऑगस्ट क्रांती मैदानात आंदोलन करण्यात आलं होतं. यात इम्रान सहभागी झाला होता.

भारतीय नागरिक नसतानाही आंदोलनात भाग घेतल्याचा ठपका ठेवत, इमिग्रेशन कायद्याच्या कलम २९ आणि ७ अंतर्गत इम्रानवर कारवाई सुरू करण्यात आली आहे. शनिवारी आंदोलन करत असताना मुंबई पोलिसांनी त्याला ताब्यात घेतलं होतं. या कारवाईनंतर इम्रानने पोलिसांच्या व्हॅनमधील स्वतःचा एक फोटो शेअर केला आणि कॅप्शनमध्ये लिहिलं, "बहुधा मी ड्राईव्हवर चाललोय."

'मी इथला नागरिक म्हणून आलोय': इम्रान खान

प्रसारमाध्यमांशी बोलताना इम्रान म्हणाला की, तो मुंबईचा एक नागरिक म्हणून तिथे गेला होता. त्याची कोणतीही विशेष मागणी नव्हती. लोकांच्या फिरण्यावर बंदी का घातली जातेय आणि त्यांचा आवाज का दाबला जातोय, असा सवाल त्याने उपस्थित केला.

"माझ्या काही मागण्या नाहीत. मी या शहरात राहणारा एक नागरिक म्हणून इथे आलोय. लोकांच्या फिरण्यावर निर्बंध का लादले जात आहेत? लोकांचा आवाज का दाबला जातोय? हे पाहण्यासाठीच मी इथे आलोय," असं इम्रानने स्पष्ट केलं. (ANI)

(हेडलाईन वगळता, या बातमीत एशियननेट न्यूजच्या संपादकीय टीमने कोणताही बदल केलेला नाही. ही बातमी सिंडिकेटेड फीडमधून प्रकाशित करण्यात आली आहे.)