Carrie Web Series: एकाकी मुलीची रहस्यमयी ताकद, प्राईमवर आलीय भन्नाट हॉरर सिरीज!

स्टीफन किंग यांच्या कादंबरीवर आधारित 'कॅरी' ही हॉरर वेब सिरीज ॲमेझॉन प्राईमवर रिलीज झाली आहे. अमानवीय ताकद असलेल्या एकाकी मुलीवर होणारा अत्याचार आणि तिच्या रहस्यमयी शक्तींचा स्फोट, याभोवती या ८ एपिसोड्सची कथा फिरते.

हॉलीवूडचे प्रसिद्ध लेखक स्टीफन किंग (Stephen King) यांच्या १९७४ च्या सुपरनॅचरल हॉरर कादंबरीवर आधारित 'कॅरी' (Carrie) वेब सिरीज ॲमेझॉन प्राईम व्हिडिओवर (Prime Video) रिलीज झाली असून ती सध्या जोरदार चर्चा घडवून आणत आहे. घरावर रहस्यमयी पद्धतीने पडणारे दगड आणि अमानवीय ताकद असलेल्या एका एकाकी मुलीभोवती फिरणारी ही सिरीज प्रेक्षकांना खिळवून ठेवण्यात यशस्वी ठरली आहे. एकूण ८ एपिसोड्स असलेल्या या हॉरर सिरीजचा हा सविस्तर रिव्ह्यू.

काय आहे 'कॅरी' वेब सिरीजची कथा?

ही सुपरनॅचरल हॉरर कथा 'कॅरी' नावाच्या एका निरागस मुलीभोवती फिरते. तिच्याकडे अमानवीय शक्तींचा खजिनाच आहे. पण, तिच्या आईने तिला कायम घरातच कोंडून वाढवलेलं असतं. बाहेरील जगाशी कोणताही संपर्क नसलेली कॅरी जेव्हा बाहेरच्या जगात मिसळायला लागते, तेव्हा शाळेतल्या मुली तिची खिल्ली उडवतात आणि तिला मानसिक त्रास देतात. हा त्रास जसजसा वाढतो, तसतशी कॅरीच्या आत दडलेली रहस्यमयी ताकद एकेक करून बाहेर पडू लागते. त्यानंतर कॅरी काय करते? तिच्या आयुष्यात कोणते अनपेक्षित वळण येते? हे तुम्हाला सिरीज पाहिल्यावरच समजेल.

दिग्दर्शन आणि मांडणी:

स्टीफन किंग यांना 'हॉररचा राजा' म्हटलं जातं. त्यांच्या या कादंबरीला माईक फ्लॅनगन (Mike Flanagan) यांनी एक नवा टच दिला आहे. सिरीजचे पहिले चार एपिसोड्स स्वतः माईक यांनी दिग्दर्शित केले आहेत, तर उर्वरित भाग केट सीगल आणि कायरा सेडगविक यांनी दिग्दर्शित केले आहेत. आजच्या काळात सोशल मीडियाचा अतिवापर आणि बुलिंग (Bullying) याचे कसे परिणाम होतात, हे हॉरर कथेशी अतिशय उत्तमरीत्या जोडलं आहे. प्रत्येक एपिसोड प्रेक्षकांची उत्सुकता ताणून धरतो.

कलाकारांचा अभिनय:

या सिरीजचं मुख्य आकर्षण म्हणजे समर एच. हॉवेल (Summer H. Howell) हिचा अभिनय. अवघ्या २२ वर्षांच्या या टॅलेंटेड अभिनेत्रीने 'कॅरी' या भूमिकेत अक्षरशः जीव ओतला आहे. या भूमिकेसाठी तब्बल १५०० मुलींचं ऑडिशन घेण्यात आलं होतं, ज्यातून समरची निवड झाली. तिच्या चेहऱ्यावरील हावभाव आणि भूमिकेची तीव्रता तिने ज्या प्रकारे साकारली आहे, ते खरंच कमाल आहे. सिएना अगुडोंग, एमिसन थॉर्नटन आणि मॅथ्यू लिलार्ड या बाकीच्या कलाकारांनीही आपापल्या भूमिकांना योग्य न्याय दिला आहे.

अंतिम निकाल (Verdict):

जर तुम्ही स्टीफन किंग यांच्या कादंबऱ्यांचे फॅन असाल किंवा तुम्हाला हॅलोवीन स्टाईल सुपरनॅचरल हॉरर कंटेंट आवडत असेल, तर या वीकेंडसाठी 'कॅरी' सिरीज एक उत्तम पर्याय आहे. ओटीटीवर काहीतरी दमदार आणि थरारक पाहायचं असेल, तर ही मस्ट-वॉच सिरीज अजिबात मिस करू नका.

रेटिंग: ४/५

कुठे पाहू शकता: ॲमेझॉन प्राईम व्हिडिओ (Amazon Prime Video)

दिग्दर्शक: माईक फ्लॅनगन

प्रमुख कलाकार: समर एच. हॉवेल, सिएना अगुडोंग, मॅथ्यू लिलार्ड आणि इतर.