मुंबई - बॉलिवूड सुपरस्टार आमिर खान हा धाडसी निर्णय घेण्यासाठी प्रसिद्ध आहे. त्याने आता सितारे.. या चित्रपटासाठी असाच निर्णय घेतला आहे. हा सिनेमा आता प्रेक्षखांना चक्क YouTube वर बघायला मिळणार आहे. जाणून घ्या कसे...
आमिर खान याने त्याच्या नव्या चित्रपटासाठी एक धाडसी आणि अभूतपूर्व पाऊल उचलले आहे. त्याचा बहुचर्चित क्रीडा-नाट्यपट ‘सितारे जमीन पर’ थिएटरनंतर आता थेट YouTube वर ‘Movies On Demand’ स्वरूपात प्रदर्शित होणार आहे. विशेष बाब म्हणजे, हा चित्रपट कोणत्याही पारंपरिक ओटीटी प्लॅटफॉर्मवर न देता, थेट यूट्यूबवर 1 ऑगस्टपासून फक्त ₹100 रुपयांमध्ये पाहता येणार आहे.
ही घोषणा एक प्रेस नोटद्वारे करण्यात आली असून, आमिर खान प्रॉडक्शन्सने यामागील कारण स्पष्ट करताना सांगितले की, “गेल्या १५ वर्षांपासून मी अशा प्रेक्षकांपर्यंत पोहोचण्याचा विचार करत होतो, जे भौगोलिक अडचणीमुळे थिएटरमध्ये जाऊ शकत नाहीत किंवा ओटीटीचे सबस्क्रिप्शन घेऊ शकत नाहीत. आता डिजिटल युगात भारताने जो प्रगतीचा टप्पा गाठला आहे, त्याचा फायदा घेत आम्ही हा निर्णय घेतला आहे.”
24
भारतात ₹100, परदेशात स्थानिक दरानुसार
‘सितारे जमीन पर’ हा चित्रपट भारतात ₹100 या अत्यल्प दरात उपलब्ध होणार आहे. याशिवाय अमेरिका, युके, ऑस्ट्रेलिया आणि ३८ इतर देशांमध्ये देखील हा चित्रपट YouTube वर प्रदर्शित केला जाणार असून, त्याचे दर स्थानिक बाजाराच्या अर्थव्यवस्थेनुसार ठरवले जातील.
UPI क्रांती आणि डिजिटल पोहोच यामुळे शक्य
आमिर खान यांनी यामध्ये UPI प्रणाली, भारतातील वाढता इंटरनेट वापर आणि YouTube ची सार्वत्रिक उपलब्धता यांना महत्त्वाचे कारण मानले आहे. “आपल्या सरकारने सुरू केलेल्या UPI योजनेमुळे आणि भारतात इलेक्ट्रॉनिक पेमेंट सिस्टीममध्ये झालेल्या प्रगतीमुळे, आता अगदी ग्रामीण भागातही डिजिटल व्यवहार शक्य झाले आहेत. त्यामुळे YouTube हा सर्वसामान्य माणसापर्यंत पोहोचणारा एक प्रभावी पर्याय ठरतो,” असे ते म्हणाले.
34
अनेक भाषांमध्ये डब व सबटायटल्ससह
‘सितारे जमीन पर’ हा चित्रपट विविध भारतीय व आंतरराष्ट्रीय भाषांमध्ये डब व उपशीर्षकांसह (subtitles) सादर होणार आहे, जेणेकरून हा चित्रपट प्रत्येक प्रेक्षकाला सहज समजेल आणि अनुभवता येईल.
‘तारे जमीन पर’चा स्पिरिच्युअल सिक्वेल
ही कथा आमिर खान यांच्या 2007 मध्ये आलेल्या ‘तारे जमीन पर’ या सुपरहिट चित्रपटाचा एक प्रकारचा आध्यात्मिक सिक्वेल आहे. ‘तारे जमीन पर’ मध्ये विद्यार्थ्यांच्या डीस्लेक्सिया या समस्येला केंद्रस्थानी ठेवण्यात आले होते, तर ‘सितारे जमीन पर’ मध्ये आमिर खान एक बास्केटबॉल प्रशिक्षकाची भूमिका साकारत आहेत. या प्रशिक्षकाला न्यूरोडायव्हर्जंट मुलांचा एक गट तयार करायचा आहे – ही कथा एक संवेदनशील, प्रेरणादायी आणि सामाजिक भान जपणारी आहे.
या चित्रपटात जेनेलिया देशमुख यांनीही महत्त्वाची भूमिका साकारली आहे. आमिर आणि जेनेलियाची केमिस्ट्री प्रेक्षकांच्या पसंतीस उतरली असून, चित्रपटाने पाच आठवड्यांत ₹195 कोटींहून अधिक कमाई करत एक यशस्वी प्रवास पूर्ण केला आहे.
प्रसन्ना यांचे दिग्दर्शन
चित्रपटाचे दिग्दर्शन आर. एस. प्रसन्ना यांनी केले असून, त्यांनी पूर्वीही सामाजिक संदेश देणाऱ्या चित्रपटांचे दिग्दर्शन केले आहे. त्यांच्या संवेदनशील दृष्टीकोनामुळे हा चित्रपट केवळ करमणूक न राहता, एक सामाजिक प्रबोधनात्मक प्रकल्प ठरतो.
