KBC : 'सैफ अली खान तर आमचा नातेवाईक लागतो', अमिताभ बच्चन यांनी उलगडलं नात्याचं गणित

‘कौन बनेगा करोडपती’च्या एका एपिसोडमध्ये सैफ अली खान आणि अक्षय कुमार आले असता, अमिताभ बच्चन यांनी सैफसोबतच्या आपल्या कौटुंबिक नात्याचा खुलासा केला.

अमिताभ बच्चन यांनी नुकतंच ‘कौन बनेगा करोडपती’च्या एका एपिसोडमध्ये सैफ अली खानसोबतच्या एका अशा नात्याचा खुलासा केला, जे फार कमी लोकांना माहीत आहे. या क्विझ शोमध्ये सैफ अली खान आणि अक्षय कुमार पाहुणे म्हणून आले होते. यावेळी गप्पांच्या ओघात बच्चन यांनी त्यांचं कुटुंब सैफशी कसं जोडलं गेलं आहे, हे सांगितलं.

कपूर कुटुंबाशी असलेलं नातं

शोच्या नव्या प्रोमोमध्ये बिग बी प्रेक्षकांना सांगताना दिसतात की, हे नातं कपूर कुटुंबाशी जोडलेलं आहे. ते म्हणाले, “सर, बऱ्याच लोकांना हे माहीत नाही की ते (सैफ) आमच्या नात्यातले आहेत. राज कपूर यांची मुलगी रितू यांचे चिरंजीव निखिल, यांचं लग्न माझ्या मुलीशी झालं आहे.”

यानंतर त्यांनी करिना कपूर खानचा उल्लेख केला. करिना ही दिग्गज अभिनेते राज कपूर यांची नात असून तिचं लग्न सैफ अली खानशी झालं आहे. या नात्यावरून बच्चन यांनी गंमतीत विचारलं की, आता त्यांनी करिनाला काय म्हणून हाक मारावी. “तर आता मला हे जाणून घ्यायचं आहे की, मी करिनाला काय म्हणून हाक मारू? करिना मला काय म्हणेल?” असा प्रश्न बच्चन यांनी विचारला. हे नात्यांचं गणित आणखी गुंतागुंतीचं होण्याआधीच सैफ हसले आणि त्यांनी पटकन उत्तर दिलं. “नशीब, हा काही प्रश्न नाहीये!” असं सैफ म्हणाले.

ही पोस्ट इन्स्टाग्रामवर पाहा

सिनेमातही एकत्र काम

या कौटुंबिक नात्यापलीकडे, अमिताभ बच्चन आणि सैफ अली खान यांनी एकत्र कामही केलं आहे. ‘एकलव्य: द रॉयल गार्ड’ (2007) आणि ‘आरक्षण’ (2011) या सिनेमांमध्ये ते एकत्र दिसले होते.

दरम्यान, अक्षय कुमार आणि सैफ आता ‘हैवान’ या सिनेमात दिसणार आहेत. प्रियदर्शन यांनी दिग्दर्शित केलेला हा एक सायको-थ्रिलर आहे. तब्बल १८ वर्षांनंतर अक्षय आणि सैफ या सिनेमातून पुन्हा एकत्र येत आहेत. सिनेमाच्या ट्रेलरमध्ये एका मनोरुग्ण आणि एका अंध व्यक्तीमधील धोकादायक पाठशिवणीचा खेळ दाखवण्यात आला आहे.

‘कौन बनेगा करोडपती’बद्दल

‘कौन बनेगा करोडपती’ हा क्विझ शो सोनी एन्टरटेन्मेंट टेलिव्हिजनवर सोमवार ते शुक्रवार रात्री ९ वाजता प्रसारित होतो. हा शो ब्रिटिश शो ‘हू वॉन्ट्स टू बी अ मिलियनेअर?’चं भारतीय व्हर्जन आहे. याच शोमधून अमिताभ बच्चन यांनी टीव्हीवर पदार्पण केलं आणि त्यांच्या करिअरला एक नवी दिशा मिळाली. गेल्या काही वर्षांत, स्पर्धकांच्या भावनिक कथा आणि बच्चन यांच्या “लॉक किया जाये” या प्रसिद्ध डायलॉगमुळे हा शो लोकांच्या आयुष्याचा एक भाग बनला आहे.