'गाडीचा दरवाजा उघडण्याचा प्रयत्न केला', मुंबईत अभिनेत्री निमिषा नायरसोबत धक्कादायक प्रकार

Actress Nimisha Nair Harassed by Bikers in Mumbai : मुंबईत उबरमधून प्रवास करताना अभिनेत्री निमिषा नायरला एक अत्यंत वाईट अनुभव आला. दारू प्यायलेल्या दोन बाईकस्वारांनी तिची कार अडवली.

Actress Nimisha Nair Harassed by Bikers in Mumbai : अभिनेत्री निमिषा नायरने प्रवासादरम्यान आलेला एक धक्कादायक अनुभव शेअर केला आहे. मुंबईतील बांद्रा परिसरातून उबर टॅक्सीने प्रवास करत असताना, दारू प्यायल्यासारखं वाटणाऱ्या दोन बाईकस्वारांनी तिचा रस्ता अडवला. इतकंच नाही, तर त्यांनी गाडीचा दरवाजा जबरदस्तीने उघडण्याचा प्रयत्न केला आणि ड्रायव्हरला धमकावलं. निमिषाने हा सगळा प्रकार सोशल मीडियावर शेअर केला आहे.

ही घटना बांद्रा पूर्वेला घडल्याचं निमिषाने आपल्या पोस्टमध्ये म्हटलं आहे. टॅक्सीतून प्रवास करत असताना तिच्या ड्रायव्हरने एका स्कूटरला ओव्हरटेक केलं. त्यानंतर स्कूटरवरील दोघांनी तिच्या टॅक्सीचा पाठलाग सुरू केला. पहाटे साडेचारच्या सुमारास हा प्रकार घडल्याचं निमिषा सांगते.

तिने आपल्या पोस्टमध्ये लिहिलं आहे, "ही घटना खेरवाडी फ्लायओव्हरजवळ घडली. दारूच्या नशेत असलेले दोन गुंड प्रवृत्तीचे लोक होते. माझ्या उबर ड्रायव्हरने त्यांच्या गाडीला ओव्हरटेक केल्याचा त्यांना राग आला होता. त्यांनी हायवेच्या मधोमध आमची गाडी अडवली आणि माझ्या ड्रायव्हरला धमकावू लागले."

"ते ड्रायव्हरला अत्यंत घाणेरड्या भाषेत शिवीगाळ करत होते. त्यांनी जबरदस्तीने गाडीचा दरवाजा उघडण्याचा प्रयत्न केला आणि मला गाडीची काच खाली करायला सांगितली," असंही निमिषाने म्हटलं आहे. जेव्हा त्या दोघांनी पाहिलं की मी या घटनेचा व्हिडिओ बनवत आहे, तेव्हा ते तिथून निघून गेले. पण जाण्यापूर्वी त्यांनी गाडीचा फोटो काढला, असंही निमिषाने स्पष्ट केलं. तिने आपल्या पोस्टमध्ये मुंबई पोलिसांना टॅग केलं आहे. या घटनेची माहिती मिळाली असून, आम्ही या प्रकरणाचा तपास करत आहोत, असं पोलीस सूत्रांनी सांगितलं आहे. या प्रकरणात कारवाई व्हावी, अशी मागणी आता सोशल मीडियावर जोर धरू लागली आहे.