Aamir Khan Wedding: ६१व्या वर्षी आमिर खान तिसऱ्यांदा बोहल्यावर, ५ जुलैला घरातच करणार लग्न!

बॉलिवूडचा मिस्टर परफेक्शनिस्ट आमिर खान वयाच्या ६१ व्या वर्षी तिसरं लग्न करणार आहे. त्याने स्वतः एका मुलाखतीत या बातमीला दुजोरा दिला असून लग्नाचा संपूर्ण प्लॅन सांगितला आहे.

आमिर खान पुन्हा एकदा त्याच्या खासगी आयुष्यामुळे चर्चेत आला आहे. अभिनेत्याने स्वतः या बातमीला दुजोरा दिला आहे की, तो ५ जुलै रोजी त्याची पार्टनर गौरी स्प्रॅटसोबत लग्न करणार आहे. ६१ वर्षांच्या आमिरचं हे तिसरं लग्न असेल. विशेष म्हणजे, कोणताही मोठा कार्यक्रम न करता, त्याने अगदी साध्या पद्धतीने घरीच नोंदणीकृत विवाह (रजिस्टर्ड मॅरेज) करण्याचा निर्णय घेतला आहे. आमिरचं म्हणणं आहे की, तो आणि गौरी त्यांच्या नात्याला पुढच्या टप्प्यावर नेण्यासाठी पूर्णपणे तयार आहेत. दरम्यान, आमिर खानची होणारी तिसरी पत्नी गौरी स्प्रॅटबद्दल लोकांची उत्सुकता वाढली आहे.

५ जुलैला होणार आमिर खान आणि गौरी स्प्रॅटचं लग्न

आमिर खानने आपल्या लग्नाच्या तारखेची पुष्टी करत सांगितलं की, तो ५ जुलै रोजी गौरी स्प्रॅटसोबत लग्न करणार आहे. हा सोहळा अत्यंत खासगी आणि साधा असेल, असंही त्याने स्पष्ट केलं. 'डेक्कन क्रॉनिकल'शी बोलताना आमिर म्हणाला, "हे घरीच होणारं एक साधं नोंदणीकृत लग्न असेल. यात फक्त दोन्ही कुटुंबातील सदस्य आणि अगदी जवळचे मित्र-मैत्रिणी सहभागी होतील. आम्हाला दोघांनाही हे खूप साधं ठेवायचं आहे." सध्या पाहुण्यांच्या यादीबद्दल कोणतीही अधिकृत माहिती समोर आलेली नाही. त्यामुळे शाहरुख खान, सलमान खान आणि आमिरचे इतर जवळचे मित्र या सोहळ्याचा भाग असतील की नाही, हे पाहणं महत्त्वाचं ठरेल.

नात्याला पुढे नेण्यासाठी आमिर-गौरी तयार

आमिरने त्याच्या ६०व्या वाढदिवसानिमित्त गौरी स्प्रॅटची मीडियाशी ओळख करून दिली होती आणि आपलं नातं सार्वजनिक केलं होतं. लग्नाच्या निर्णयावर बोलताना आमिर म्हणाला, "हो, हे खरं आहे. आता आम्हाला दोघांनाही वाटतं की, आम्ही आमच्या नात्याला पुढच्या टप्प्यावर नेण्यासाठी तयार आहोत." तो पुढे म्हणाला, "मी पूर्णपणे समाधानी आहे. गौरी आणि मी एकमेकांबद्दल खूप गंभीर आहोत आणि आमच्यात एक घट्ट नातं आहे. आम्ही आयुष्यभराच्या जोडीदारासारखेच एकत्र आहोत. माझ्या मनात तर मी तिच्याशी आधीच लग्न केल्यासारखं मला वाटतं."

कोण आहे आमिर खानची होणारी तिसरी पत्नी गौरी स्प्रॅट?

गौरी स्प्रॅट ही मूळची बंगळूरुची असून वेलनेस आणि ब्यूटी इंडस्ट्रीमध्ये काम करते. ती फिलिप स्प्रॅट यांची नात आहे, जे मूळचे ब्रिटनचे होते आणि १९२० च्या दशकात भारतात आले होते. नंतर ते भारतीय स्वातंत्र्य चळवळीशीही जोडले गेले. गौरीचं याआधी लग्न झालं असून तिला क्विन नावाचा सात वर्षांचा मुलगाही आहे.

आमिर खानची पहिली दोन लग्नं आणि मुलं

गौरी स्प्रॅटसोबतचं हे आमिर खानचं तिसरं लग्न असेल. आमिरचं पहिलं लग्न रीना दत्तासोबत झालं होतं, ज्यांच्यापासून त्याला जुनैद खान आणि आयरा खान ही दोन मुलं आहेत. नंतर दोघे वेगळे झाले, पण आजही त्यांचे संबंध चांगले असल्याचं म्हटलं जातं. यानंतर आमिरने चित्रपट निर्माती किरण रावशी लग्न केलं. १६ वर्षे एकत्र राहिल्यानंतर दोघांनी वेगळं होण्याचा निर्णय घेतला. मात्र, आजही दोघे मिळून त्यांचा मुलगा आझादचं संगोपन करत आहेत.