Sleeper Bus Accident: मारारीकुलममध्ये स्लीपर बस उलटून तरुणाचा मृत्यू, १३ जण जखमी

डिजिटल मार्केटिंग क्षेत्रात काम करणारा आदिल कन्नूरहून परतत होता. आज पहाटे पाचच्या सुमारास हा भीषण अपघात झाला.

चेरथला: राष्ट्रीय महामार्गावर मारारीकुलम कलितट्टू जंक्शनजवळ एक खासगी स्लीपर बस उलटली. या भीषण अपघातात एका तरुणाचा मृत्यू झाला असून १३ जण जखमी झाले आहेत. ही बस मंगळुरूहून तिरुवनंतपुरमला जात होती.

अपघातात जीव गमावलेल्या तरुणाचं नाव आदिल सजीव (२५) असं आहे. तो पंडालममधील मंटुका एमिनन्स व्हिलेज येथील नुमी मंझिलचा रहिवासी होता. डिजिटल मार्केटिंग क्षेत्रात काम करणारा आदिल कन्नूरहून आपल्या घरी परतत होता. आज पहाटे पाचच्या सुमारास हा अपघात झाला. त्यावेळी बसमध्ये सुमारे १४ प्रवासी होते. महामार्गावरून बस थेट सर्व्हिस रोडवर जाऊन उलटली. महामार्ग आणि सर्व्हिस रोडच्या उंचीत सुमारे दोन फुटांचा फरक आहे. याच धोकादायक वळणावर बसवरील नियंत्रण सुटलं.

ड्रायव्हरला डुलकी लागल्याने हा अपघात झाल्याचा पोलिसांचा प्राथमिक अंदाज आहे. अपघात इतका भयंकर होता की बस एका बाजूला पूर्णपणे कलंडली. अपघाताचा मोठा आवाज ऐकून स्थानिक नागरिक आणि मारारीकुलम पोलिसांनी लगेच घटनास्थळी धाव घेतली आणि बचावकार्य सुरू केलं. सर्व जखमींना अलप्पुझा जनरल हॉस्पिटल आणि जवळच्या खासगी रुग्णालयांमध्ये दाखल करण्यात आलं आहे. यातील तिघांना गंभीर दुखापत झाली असली, तरी त्यांची प्रकृती आता धोक्याबाहेर असल्याचं रुग्णालय प्रशासनाने स्पष्ट केलं आहे.

आदिलचा मृतदेह सध्या अलप्पुझा मेडिकल कॉलेज हॉस्पिटलच्या शवागारात ठेवण्यात आला आहे. मारारीकुलम पोलिसांनी या प्रकरणी गुन्हा दाखल करून तपास सुरू केला आहे. क्रेनच्या साहाय्याने अपघातग्रस्त बस बाजूला करून महामार्गावरील वाहतूक पूर्ववत करण्यात आली आहे.

एशियानेट न्यूज लाईव्ह पाहा