Pune Crime News : “मला एक पप्पी दे, हवं ते देतो”; पुण्यातील एका क्लिनिकमध्ये 73 वर्षीय वृद्धानं केला तरुणीचा विनयभंग
सार
Pune Crime News : पुण्यातील विश्रामबाग रोडवरील एका खासगी क्लिनिकमध्ये २७ वर्षीय तरुणीचा ७३ वर्षीय वृद्धाने विनयभंग केल्याचा आरोप आहे. आरोपीने अश्लील वर्तन करत तरुणीला मानसिक त्रास दिला. पोलिसांनी आरोपीला अटक केली असून पुढील तपास सुरू आहे.
पुणे : महाराष्ट्राच्या सांस्कृतिक राजधानीत महिलांच्या सुरक्षेवर पुन्हा एकदा गंभीर प्रश्नचिन्ह उभं राहिलं आहे. पुण्यातील विश्रामबाग रोडवरील एका खासगी क्लिनिकमध्ये घडलेल्या घटनेने संपूर्ण शहरात संतापाची लाट उसळली आहे. 27 वर्षीय तरुणीचा 73 वर्षीय वृद्धाने विनयभंग केल्याचा आरोप आहे. आरोपीने केलेल्या अश्लील वर्तनामुळे तरुणीला प्रचंड मानसिक धक्का बसला असून, तिच्या तक्रारीवरून पोलिसांनी आरोपीला अटक केली आहे.
नेमकं काय घडलं?
ही घटना 3 जुलै 2025 रोजी सायंकाळी 7 च्या सुमारास घडली. सुरेशचंद चोरडिया (वय 73) हा वृद्ध रुग्ण म्हणून क्लिनिकमध्ये आला. रिसेप्शनवर एकट्या असलेल्या तरुणीकडे पाहून त्याने "मला एक पप्पी दे", असं अश्लील म्हणत तिला विनयभंगाला सामोरं जावं लागलं. एवढ्यावरच न थांबता, तो म्हणाला, "माझ्याकडे पैसे आहेत. तुला हॉटेलमध्ये जेवायला घेऊन जातो. जे हवं ते देतो, पण तू मला पाहिजे ते कर." त्याने तरुणीच्या गालाला हात लावण्याचाही प्रयत्न केला. ही अत्यंत अश्लील आणि मनस्तापदायक वर्तणूक होती.
धक्कादायक अनुभव आणि तात्काळ तक्रार
घाबरलेल्या तरुणीने तात्काळ क्लिनिक सोडून बाहेर धाव घेतली. मात्र, आरोपीने तिचा पाठलाग करत पुन्हा त्रास देण्याचा प्रयत्न केला. "उद्या क्लिनिकमध्ये असशील का?" असे विचारून त्याने तिला पुन्हा छळण्याचा प्रयत्न केला. पोलिसात दाखल तक्रारीनंतर विश्रामबाग पोलीस ठाण्याने तात्काळ कारवाई करत आरोपीला अटक केली असून, संबंधित कलमांनुसार गुन्हा नोंदवण्यात आला आहे. पोलीस सध्या पुढील तपास करत आहेत.
सामाजिक संताप आणि महिला सुरक्षेचा प्रश्न
या घटनेमुळे परिसरात संतापाची लाट उसळली आहे. पुण्यासारख्या शहरात अशा प्रकारच्या घटना वारंवार घडत असल्यामुळे महिलांच्या सुरक्षेचा प्रश्न अधिक गंभीर बनतो आहे. 27 वर्षांची महिला आपल्या कामाच्या ठिकाणी सुरक्षित नसेल, तर हा धोक्याचा इशारा मानावा लागेल.
महिलांविरोधात वाढणारे अश्लील वर्तन आणि मानसिक त्रास याला आळा घालण्यासाठी कठोर कायद्यात अंमलबजावणी गरजेची आहे. तरुणीने दाखवलेलं धाडस कौतुकास्पद असून, अशा घटना थांबवण्यासाठी समाजाने एकजूट होण्याची गरज आहे.