Himachal Horror: दिवाळीच्या रात्री फटाके फोडण्यावरून वाद, शेजाऱ्याने दाम्पत्याला थारखाली चिरडून मारले
सार
हिमाचल प्रदेशातील उना जिल्ह्यात दिवाळीच्या दिवशी फटाके फोडण्यावरून झालेल्या वादानंतर एका व्यक्तीने आपल्या शेजाऱ्यांच्या अंगावर महिंद्रा थार गाडी घातली. या भयंकर घटनेत एका दाम्पत्याचा दुर्दैवी अंत झाला आहे.
हिमाचल प्रदेशातील उना जिल्ह्यात दिवाळी साजरी करताना फटाके फोडण्यावरून झालेल्या वादानंतर एका व्यक्तीने आपल्या महिंद्रा थारने शेजाऱ्यांना चिरडल्याची धक्कादायक घटना घडली आहे. हिमाचल प्रदेशातील बडोली गावात दिवाळीच्या रात्री ही घटना घडली. ओंकार सिंग आणि त्यांच्या पत्नी वीणा देवी असे या घटनेत जीव गमावलेल्या दाम्पत्याचे नाव आहे.
पीडित कुटुंबातील सदस्यांनी दिलेल्या माहितीनुसार, शेजारी राहणाऱ्या जरनैल सिंगने फटाके फोडण्यास विरोध केला. यावरून दोन्ही कुटुंबात शाब्दिक बाचाबाची झाली. जुन्या वादातून या भांडणाचे रूपांतर लवकरच हाणामारीत झाले.
पोलिसांनी दिलेल्या माहितीनुसार, या वादानंतर संतापलेला जरनैल सिंग आपल्या घरी गेला आणि महिंद्रा थार गाडी घेऊन परत आला.
ओंकार सिंग यांचे वडील अजमेर सिंग यांनी पोलिसात दिलेल्या तक्रारीत म्हटले आहे की, त्यांचे कुटुंब दिवाळी साजरी करत असताना रात्री साडे नऊच्या सुमारास जरनैल सिंग त्याची गाडी घेऊन आला आणि त्याने जाणीवपूर्वक त्यांच्या मुलाच्या अंगावर गाडी घातली. त्यानंतर आरोपीने गाडी मागे घेतली आणि वीणा देवी यांनाही चिरडले.
आरोपीला थांबवण्याचा प्रयत्न करताना अजमेर सिंग आणि त्यांच्या पत्नीलाही दुखापत झाली आहे.
या भयंकर हल्ल्यात गंभीर जखमी झालेल्या ओंकार आणि वीणा यांना तातडीने उना येथील सरकारी रुग्णालयात दाखल करण्यात आले. हे रुग्णालय बडोली गावापासून १० किलोमीटर अंतरावर आहे. मात्र, उपचारादरम्यान दोघांचाही मृत्यू झाला.
या घटनेत आरोपी जरनैल सिंगही जखमी झाला असून, त्यालाही सुरुवातीला उना येथील रुग्णालयात नेण्यात आले होते. त्यानंतर डॉक्टरांनी त्याला पुढील उपचारासाठी चंदीगड येथील पोस्ट ग्रॅज्युएट इन्स्टिट्यूट ऑफ मेडिकल एज्युकेशन अँड रिसर्च (PGIMER) मध्ये रेफर केले.
आरोपीच्या मुलाचा कोयता हल्ल्याचा आरोप
दुसरीकडे, आरोपीच्या मुलाने वेगळी तक्रार दाखल करत ओंकार सिंग आणि त्यांच्या कुटुंबावर कोयत्याने हल्ला केल्याचा आरोप केला आहे. या हल्ल्यात आपण आणि आपले वडील जखमी झाल्याचा दावा त्याने केला आहे.
उनाचे पोलीस अधीक्षक सचिन हिरेमठ यांनी सांगितले की, प्राथमिक तपासात या दोन्ही कुटुंबांमध्ये जुने वाद असल्याचे समोर आले आहे.
“तक्रारीनुसार, आरोपी जरनैल सिंग याने दोन्ही पीडितांवर थार गाडी घातली, ज्यामध्ये त्यांचा मृत्यू झाला. जरनैल सिंग विरोधात बीएनएस कलम १०३ अंतर्गत हत्येचा गुन्हा दाखल करण्यात आला आहे. या प्रकरणाचा पुढील तपास सुरू आहे,” असे हिरेमठ म्हणाले.
पोलीस अधीक्षकांनी पुढे सांगितले की, एफआयआरमध्ये काही अल्पवयीन मुलांचीही नावे आहेत, त्यांच्यावर बाल न्याय कायद्यांतर्गत कारवाई केली जात आहे.
“एफआयआरमध्ये काही अल्पवयीन मुलांचीही नावे आहेत आणि त्यांच्यावर बाल न्याय कायद्यांतर्गत कारवाई केली जात आहे,” असे पोलीस अधीक्षकांनी सांगितले. त्यांनी गुन्हेगारी स्थळाची पाहणीही केली.
दरम्यान, या धक्कादायक दुहेरी हत्याकांडाच्या घटनेनंतर बडोली गावात तणाव वाढू नये यासाठी पोलिसांनी बंदोबस्त वाढवला आहे. फॉरेन्सिक टीमने सोमवारी घटनास्थळावरून पुरावे आणि नमुने गोळा केले.
रविवारी रात्रीच्या घटनेनंतर आरोपीने आपली थार गाडी उना येथील आपल्या जुन्या वाहन डीलरशिप गॅरेजमध्ये उभी केल्याचा आरोप आहे. पोलिसांनी ते गॅरेजही सील केले आहे.
या प्रकरणाचा पुढील तपास सुरू आहे.