Crime News: रील्स बनवू नको म्हटल्याने मध्यप्रदेशात पत्नीने घेतला पतीचा जीव...

Crime News: रील्स अपलोड करण्यास नकार दिल्याचा राग मनात ठेवून एका महिलेने आपल्या पतीचा जीव घेतला. रील्सवरून दोघांमध्ये भांडण झाले होते. भांडण विकोपाला गेल्यावर रागाच्या भरात तिने गळा दाबून पतीचे आयुष्य संपवले. 

रील्सच्या क्रेझमुळे कुटुंबाचा नाश

मनोरंजनाच्या नावाखाली सुरू झालेल्या रील्सच्या क्रेझने एका कुटुंबाचाच नाश केल्याची घटना मध्य प्रदेशातील झाबुआ जिल्ह्यात समोर आली आहे. रील्स बनवण्यास पतीने विरोध केल्याने संतापलेल्या पत्नीनेच त्याचा गळा दाबून खू* केल्याचे आता उघड झाले आहे. जिल्ह्यातील थांदला पोलीस स्टेशनच्या हद्दीत गेल्या गुरुवारी 25 वर्षीय कैलाश नावाच्या तरुणाचा मृतदेह आढळला होता. शरीरावर कोणत्याही जखमेच्या खुणा नसतानाही, मृतदेह संशयास्पद स्थितीत आढळून आला. मृतदेहाजवळ पत्नी रडत बसल्याने सुरुवातीला सर्वांनाच तिची दया आली.

पती-पत्नीमध्ये जोरदार भांडण

मध्यरात्री पती-पत्नीमध्ये मोठे भांडण झाले होते, अशी माहिती कुटुंबीयांनी पोलिसांना दिली. पत्नीनेच कैलाशची ह*या केल्याच्या संशयावरून कुटुंबीयांनी तक्रार दाखल केली. या तक्रारीच्या आधारे पोलिसांनी तपास सुरू केला.

तपासात धक्कादायक सत्य उघड

प्राथमिक तपासात हे प्रकरण नैसर्गिक मृत्यूचे वाटत असले तरी, चौकशीदरम्यान एक धक्कादायक सत्य समोर आले. घटनेच्या एक दिवस आधी, एका लग्न समारंभातील डान्सचा व्हिडिओ रील्ससाठी शूट करून सोशल मीडियावर अपलोड करण्याची पत्नीची इच्छा होती. याला कैलाशने तीव्र विरोध केला होता.

YouTube वर ह*येची पद्धत शोधली

यावरून झालेले भांडण विकोपाला गेले. संतापलेल्या पत्नीने YouTube वर ह*ये च्या पद्धती शोधल्या आणि त्याच रात्री फेट्याने कैलाशचा गळा दाबून खू* केला, असे पोलिसांनी सांगितले. कसून चौकशी केली असता, आरोपी महिलेने आपला गुन्हा कबूल केला आहे.

याप्रकरणी आरोपी महिलेला पोलिसांनी अटक केली असून, पुढील तपास सुरू आहे. रील्स, लाईक्स आणि सोशल मीडियाचा अतिरेक कोणत्या थराला जाऊ शकतो, याचे हे एक भयंकर उदाहरण आहे.