Bengaluru Crime: बंगळुरूत कोयता गँगची दहशत, रस्त्यावर ४ जणांवर सपासप वार
सार
बंगळुरूच्या रस्त्यांवर रविवारी रात्री दुचाकीवरून आलेल्या बुरखाधारी गुंडांनी कोयत्याने हल्ला करत दहशत माजवली. या अचानक झालेल्या हल्ल्यात चार जण जखमी झाले असून, पोलिसांनी तपास सुरू केला आहे.
बंगळुरूच्या रस्त्यांवर रविवारी रात्री एक थरारक घटना घडली. दुचाकीवरून आलेल्या काही बुरखाधारी गुंडांनी हातात कोयते घेऊन रस्त्यावरील लोकांवर अचानक हल्ला केला. या हल्ल्यात चार जण जखमी झाले आहेत. ही संपूर्ण घटना सीसीटीव्ही कॅमेऱ्यात कैद झाली असून, शहरात भीतीचे वातावरण आहे.
पोलिसांनी दिलेल्या माहितीनुसार, रविवारी रात्री ९ च्या सुमारास उत्तरहळ्ळी मेन रोडवरील अरेहळ्ळी गेटजवळ हा प्रकार घडला. तीन दुचाकींवरून एकूण सहा जण आले होते. यातील चौघांनी हेल्मेट घातले होते, तर दोघांनी तोंडाला मास्क लावला होता.
Unidentified Gang Goes on Stabbing Spree in Bengaluru; Several Injured
Bengaluru
Panic gripped parts of Southwest #Bengaluru on Sunday night after a gang of unidentified men allegedly went on a stabbing spree at multiple locations in Uttarahalli, injuring several people in a… pic.twitter.com/qVJDzKxGtd— Yasir Mushtaq (@path2shah) September 21, 2026
या टोळक्याने पहिला हल्ला मारम्मा सर्कलजवळ केला. तिथे किरण एन आणि त्याचा मित्र रस्त्याच्या कडेला उभे होते. कोणत्याही कारणाशिवाय या गुंडांनी त्यांच्यावर कोयत्याने वार केले.
त्यानंतर हे गुंड अरेहळ्ळी कमानीजवळ असलेल्या एका मासळीच्या दुकानाकडे गेले. तिथे त्यांनी राजू आणि रवी नावाच्या आणखी दोन तरुणांवर जीवघेणा हल्ला केला.
या अचानक झालेल्या हल्ल्यांमुळे परिसरात एकच गोंधळ उडाला. लोक जीव वाचवण्यासाठी सैरावैरा पळू लागले. या घटनेत एकूण चार जण जखमी झाले आहेत. त्यापैकी तिघांना उपचारानंतर रुग्णालयातून सोडण्यात आले आहे, तर एकावर अजूनही उपचार सुरू आहेत.
नैऋत्य विभागाच्या पोलीस उपायुक्त एस. के. सौम्यालता यांनी सांगितले की, पोलिसांनी चार संशयितांची ओळख पटवली आहे. आरोपींना पकडण्यासाठी सुब्रमण्यपुरा पोलीस ठाण्याच्या अंतर्गत तीन विशेष पथके तयार करण्यात आली आहेत.
"रात्री ९ च्या सुमारास दुचाकीवरून आलेल्या गुंडांनी मारम्मा सर्कलजवळ किरण आणि त्याच्या मित्रावर विनाकारण हल्ला केला. त्यानंतर याच टोळक्याने अरेहळ्ळी कमानीजवळ राजू आणि रवी यांना मारहाण केली," अशी माहिती सौम्यालता यांनी दिली.
या हल्ल्यामागचे नेमके कारण अद्याप समजू शकलेले नाही. पोलीस या प्रकरणाचा कसून तपास करत आहेत.