शेवयांची खीर नाही, बनवा दुबईचा फेमस 'कुनाफा'

पारंपरिकरित्या ही मिठाई 'कदायफ पेस्ट्री' वापरून बनवली जाते. पण तुम्ही घरात उपलब्ध असलेल्या शेवयांपासूनही तसाच अप्रतिम कुनाफा तयार करू शकता.

बारीक शेवया - 2 कप, तूप - 4 मोठे चमचे, मोझझेरेला चीज - 1 कप, दूध - 2 मोठे चमचे, साखर - 1 कप, पाणी - ½ कप, वेलची पूड - ½ चमचा, गुलाब पाणी - ½ चमचा, पिस्ता - 2 मोठे चमचे

सर्वात आधी एका पॅनमध्ये साखर आणि पाणी एकत्र करून 4-5 मिनिटे उकळवा. हलका चिकट पाक तयार झाल्यावर त्यात वेलची पूड आणि गुलाब पाणी घाला. गॅस बंद करून पाक थंड होण्यासाठी बाजूला ठेवा.

एका मोठ्या भांड्यात शेवया घ्या आणि हाताने थोडे बारीक करून घ्या. आता त्यात वितळलेले तूप घालून चांगले मिक्स करा. प्रत्येक शेवयांला तूप व्यवस्थित लागले पाहिजे.

एका पॅन किंवा केक टिनमध्ये अर्ध्या शेवया पसरवून घ्या. त्यावर किसलेले मोझझेरेला चीज आणि थोडे दूध घाला. आता उरलेल्या शेवया चीजवर पसरवून हलक्या हाताने दाबून सेट करा.

पॅनवर झाकण ठेवून मंद आचेवर 8-10 मिनिटे कुनाफा शिजवा. खालचा थर कुरकुरीत आणि सोनेरी झाल्यावर, एका प्लेटच्या मदतीने तो पलटा. आता दुसरी बाजूही 4-5 मिनिटे शिजवून घ्या. 

तयार झालेल्या गरमागरम कुनाफ्यावर थंड झालेला साखरेचा पाक घाला. वरून बारीक चिरलेले पिस्ते टाकून सजवा. कुनाफा नेहमी थोडा गरम असतानाच सर्व्ह करा.