सिनेमागृहात मिळणारे कुरकुरीत पॉपकॉर्न घरी बनवा, पद्धत जाणून घ्या

सिनेमा पाहताना खमंग आणि बटरयुक्त पॉपकॉर्न खाण्याचा आनंद काही वेगळाच असतो. बाजारात मिळणाऱ्या पॉपकॉर्नप्रमाणेच कुरकुरीत आणि स्वादिष्ट पॉपकॉर्न घरी कसा तयार करायचा? 

पॉपकॉर्नच्या बिया – १/२ कप, बटर (लोणी) – ३ टेबलस्पून, तेल – १ टेबलस्पून, चवीनुसार मीठ, फ्लेवर्ससाठी चीज पावडर / कॅरामेल / मसाला

जाड बुडाच्या मोठ्या भांड्यात पॉपकॉर्न उत्तम तयार होतो. भांड्याला झाकण असणे आवश्यक आहे, जेणेकरून पॉपकॉर्न बाहेर उडणार नाहीत.

गॅसवर मध्यम आचेवर तेल आणि २ टेबलस्पून बटर टाका. बटर पूर्णतः वितळल्यावर त्यात १/२ चमचा मीठ घाला. आता त्यात १-२ पॉपकॉर्नचे दाणे टाका आणि झाकण ठेवा.

आता संपूर्ण १/२ कप पॉपकॉर्नचे दाणे टाका आणि झाकण लावा. गॅस मध्यम ते कमी आचेवर ठेवा आणि भांडे हलक्या हाताने हलवा. काही सेकंदांत पॉपकॉर्न फुटण्यास सुरुवात होईल.

पॉपकॉर्न फुटण्याचा आवाज मंद झाला की गॅस बंद करा. झाकण १ मिनिट तसेच ठेवा, जेणेकरून उष्णतेने उरलेले दाणेही फुटतील.