घरच्याघरी अशी करा काकडीची लागवड

काकडीच्या रोपाला भरपूर सूर्यप्रकाश मिळणे आवश्यक आहे. पाणी साचणार नाही अशी जागा निवडा. माती भुसभुशीत करून त्यात शेणखत, निंबोळी पेंड आणि बोन मील मिसळून वाफे तयार करा.

बिया ४-५ फूट अंतरावर रांगेत लावा. प्रत्येक वाफ्यात ३-४ बिया टाका. पेरणीपूर्वी बिया २-३ तास पाण्यात भिजत ठेवल्यास त्या लवकर रुजतात.

रोपे वाढू लागल्यावर वाफ्याभोवती हिरवा पालापाचोळा किंवा सुक्या पानांचा वापर करून आच्छादन (मल्चिंग) करा. यामुळे जमिनीत ओलावा टिकून राहतो.

वेली वाढू लागल्यावर त्यांना आधार देण्यासाठी मांडव तयार करा किंवा दोरी बांधून वेली वर चढवा. वेली जमिनीला टेकल्या नाहीत तर काकड्या सडत नाहीत.

काकडीच्या रोपाला दररोज नियमितपणे पाणी द्या. पण मुळाशी पाणी साचणार नाही याची काळजी घ्या. फळे लागताना पाणी कमी पडल्यास काकडी कडू होऊ शकते.

वेली वाढताना बेसनाचे पाणी, जीवामृत किंवा तांदळाच्या पेजमध्ये शेण मिसळून सेंद्रिय खत म्हणून रोपाच्या मुळाशी घाला.

रोपाला फळे लागण्याच्या वेळी वाफ्याभोवती थोडी राख शिंपडा. यामुळे रोपाला जास्त फुले आणि फळे लागण्यास मदत होते.

काकडीच्या पिकाला फळमाशांचा जास्त त्रास होतो. त्यामुळे काकड्या लहान असतानाच त्यांना पेपर किंवा प्लास्टिक कव्हरने झाकून सुरक्षित करा.