तांदूळ आणि डाळींना कीड लागू नये म्हणून करा हे उपाय!

अनेकदा आपण धान्याच्या डब्याचे झाकण नीट लावत नाही. त्यामुळे डब्यात हवा जाते. या हवेमुळे धान्याला कीड लागते आणि डाळी खराब होतात. त्यामुळे डबा नेहमी घट्ट बंद करा.

ओल्या हातांनी धान्य काढल्यास तांदळात ओलावा निर्माण होतो. यामुळे धान्याला लवकर कीड लागते. असे कीड लागलेले तांदूळ आणि डाळी खाल्ल्यास आरोग्याच्या समस्या उद्भवू शकतात.

डाळी आणि धान्याला कीड लागू नये म्हणून साठवणीच्या डब्यात कडुलिंबाची काही पाने ठेवा. कडुलिंबाच्या वासामुळे कीड धान्यापासून दूर राहते आणि धान्य सुरक्षित राहते.

डाळी आणि तांदूळ साठवून ठेवण्यापूर्वी डबा पूर्णपणे स्वच्छ आणि कोरडा असल्याची खात्री करा. धान्याच्या साठवणीत स्वच्छतेची विशेष काळजी घेणे अत्यंत गरजेचे आहे.

तांदळाला जास्त काळ किडीपासून सुरक्षित ठेवण्यासाठी तुम्ही डब्यात वाळलेली पुदिन्याची पाने टाकू शकता. याशिवाय वाळलेल्या कारल्याच्या सालींचाही वापर करता येतो.

तांदूळ आणि डाळी साठवण्यासाठी प्लास्टिकचे डबे उत्तम मानले जातात. पण तुम्ही कोणतेही डबे वापरत असलात तरी, दर १५ दिवसांनी धान्य एकदा नक्की तपासून पाहा.