Asia Richest People : मुकेश अंबानींना मागे टाकत झांग यिमिंग ठरले आशियातील दुसरे सर्वात श्रीमंत व्यक्ती

Bloomberg Billionaires Index : ब्लूमबर्गच्या ताज्या अहवालानुसार ByteDance चे सह-संस्थापक झांग यिमिंग यांनी संपत्ती वाढवत मुकेश अंबानी यांना मागे टाकत आशियातील दुसऱ्या क्रमांकाच्या श्रीमंत व्यक्तीचा दर्जा मिळवला आहे. अंबानी आता तिसऱ्या स्थानी आले असून AI आणि टेक सेक्टरमधील वाढ यामागील प्रमुख कारण आहे.

Bloomberg Billionaires Index : रिलायन्स इंडस्ट्रीजचे अध्यक्ष मुकेश अंबानी यांना आता आशियातील दुसऱ्या क्रमांकाच्या श्रीमंत व्यक्तीचा दर्जा गमवावा लागला आहे. ब्लूमबर्गच्या ताज्या अहवालानुसार, टिकटॉकच्या पॅरेंट कंपनी ByteDance चे सह-संस्थापक झांग यिमिंग यांनी संपत्तीमध्ये मोठी वाढ नोंदवत हा क्रमांक मिळवला आहे.

संपत्तीच्या क्रमवारीत मोठा बदल

ब्लूमबर्ग बिलियनेयर्स इंडेक्सनुसार झांग यिमिंग यांच्या संपत्तीत झालेल्या झपाट्याने वाढीमुळे ते आता आशियातील दुसरे सर्वात श्रीमंत व्यक्ती ठरले आहेत. त्यांच्या ByteDance कंपनीच्या शेअर्सची किंमत मोठ्या प्रमाणात वाढली असून याचा थेट परिणाम त्यांच्या नेटवर्थवर झाला आहे.

ByteDance चा एआयवर मोठा फोकस

ByteDance ही चीनमधील सर्वात चर्चेत असलेली खासगी कंपनी असून सध्या ती आर्टिफिशियल इंटेलिजन्स (AI) क्षेत्रात मोठी गुंतवणूक करत आहे. कंपनी अमेरिकन मोठ्या टेक कंपन्यांना टक्कर देण्यासाठी आणि जागतिक स्तरावर आपली पकड मजबूत करण्यासाठी रणनीती आखत आहे. यासाठी कंपनी सुमारे 6.70 लाख कोटी रुपये इतका मोठा खर्च करण्याचा विचार करत असल्याचेही अहवालात नमूद करण्यात आले आहे.

झांग यिमिंग यांची संपत्ती किती?

ब्लूमबर्ग इंडेक्सनुसार झांग यिमिंग यांची एकूण संपत्ती सध्या 92.8 अब्ज डॉलर्स (सुमारे 8.88 लाख कोटी रुपये) इतकी आहे. मार्च 2019 पासून त्यांच्या संपत्तीत सात पटाहून अधिक वाढ झाली आहे. त्या वेळी त्यांची संपत्ती सुमारे 13 अब्ज डॉलर्स होती.

TikTok आणि AI चॅटबॉटची वाढती लोकप्रियता

ByteDance चा TikTok आणि त्यांचा AI चॅटबॉट Doubao सध्या प्रचंड लोकप्रिय झाला आहे. Doubao चा दरमहा 30 कोटींपेक्षा जास्त वापर होत असून तो चीनमधील सर्वात लोकप्रिय AI चॅटबॉट मानला जातो.

अंबानी आता तिसऱ्या स्थानी

ब्लूमबर्ग इंडेक्सनुसार, अदानी समूहाचे गौतम अदानी 117.4 अब्ज डॉलर्स संपत्तीसह आशियातील सर्वात श्रीमंत व्यक्ती आहेत. तर मुकेश अंबानी 86.9 अब्ज डॉलर्स (सुमारे 8.32 लाख कोटी रुपये) संपत्तीसह आता तिसऱ्या स्थानी घसरले आहेत.