World Dead End Road : जगातील शेवटचा रस्ता कुठे आहे माहितीये? पृथ्वीच्या या टोकावर काय आहे?

World Dead End Road: पृथ्वीवरचा शेवटचा रस्ता नेमका कुठे आहे? गल्लीतले डेड एंड आपण नेहमीच पाहतो, पण या जगाचा डेड एंड कुठे आहे? तिथे काय पाहायला मिळतं?

जगातील शेवटचा रस्ता

हे जग खूप मोठं आहे आणि इथे अनेक आश्चर्यकारक गोष्टी आहेत. निसर्गाचं सौंदर्य आणि साहसी प्रवासाची आवड असणाऱ्यांसाठी नॉर्वे देश खूप खास आहे. नॉर्वेमधल्या एका हायवेला जगातील 'शेवटचा रस्ता' किंवा 'पृथ्वीचा डेड एंड' म्हणतात. या रस्त्याचं नाव युरोपियन रूट ई-६९ (E-69 Highway) असं आहे. इथे गेल्यावर आकाश आणि जमीन एकत्र आल्यासारखं वाटतं.

ई-६९ हायवेची खास वैशिष्ट्ये

उत्तर ध्रुवाच्या (North Pole) अगदी जवळ असलेला हा रस्ता १२९ किलोमीटर लांब आहे. हा रस्ता नॉर्वेच्या ओल्डरफजॉर्ड (Olderfjord) गावाला नॉर्थ केप (North Cape) सोबत जोडतो. या मार्गावर एकूण पाच बोगदे (Tunnels) आहेत. यातला नॉर्थ केप बोगदा सर्वात महत्त्वाचा आहे. हा बोगदा समुद्रसपाटीपासून २१२ मीटर खाली आणि समुद्राच्या आत ६.९ किलोमीटर लांब आहे. हे इंजिनिअरिंगचं उत्तम उदाहरण पर्यटकांना खूप आकर्षित करतं.

कठोर हवामान आणि नियम

या रस्त्यावरून प्रवास करणं सोपं नाही. उत्तर ध्रुवाजवळ असल्यामुळे इथलं हवामान खूप खराब असतं. हिवाळ्यातच नाही तर उन्हाळ्यातही इथे खूप थंडी असते. सोसाट्याचा वारा आणि प्रचंड बर्फवृष्टी इथे नेहमीच होते.

या भयानक हवामानामुळे पर्यटकांना काही कडक नियम पाळावे लागतात. या हायवेवर कोणालाही एकट्याने प्रवास करायची परवानगी नाही. बर्फाच्या वादळात अडकू नये म्हणून गाड्यांचा ताफा (Convoy) एकत्रच सोडला जातो.

पर्यटकांसाठी एक अद्भुत अनुभव

पृथ्वीच्या उत्तर ध्रुवावर थेट पाऊल ठेवणं प्रत्येकाला शक्य नसतं. म्हणूनच साहसी पर्यटक ई-६९ च्या शेवटच्या टोकापर्यंत जातात आणि उत्तर ध्रुवाजवळ असल्याचा अनुभव घेतात. हिवाळ्यात रात्रीच्या वेळी आकाशात दिसणारे 'अरोरा बोरेलिस' (Northern Lights) पर्यटकांचे डोळे दीपवून टाकतात. आकाशात हिरव्या आणि गुलाबी रंगाचे प्रकाश नाचताना दिसतात. हा नजारा आयुष्यात कधीही न विसरता येणारा अनुभव देतो.