Lottery Winner : 10.9 कोटींची लॉटरी फेकली कचऱ्यात, पुढे जे घडलं ते वाचून थक्क व्हाल

इटलीमध्ये एका महिलेने गैरसमजातून 10.9 कोटी रुपयांचं बक्षीस लागलेलं लॉटरीचं तिकीट कचराकुंडीत फेकून दिलं. पण नशीब बलवत्तर म्हणून, दोन दिवसांच्या शोधानंतर सफाई कर्मचाऱ्यांनी ते शोधून काढलं आणि महिलेला तिचं हरवलेलं नशीब परत मिळालं.

इटली : एका महिलेने तब्बल 10.9 कोटी रुपये (1 मिलियन युरो) जिंकलेलं लॉटरीचं तिकीट चुकून कचराकुंडीत फेकून दिलं. पण दोन दिवसांच्या अथक प्रयत्नांनंतर सफाई कर्मचाऱ्यांनी ते शोधून काढलं आणि महिलेला परत दिलं. दक्षिण इटलीतील बिटोंटो शहरात ही नशिबाला कलाटणी देणारी नाट्यमय घटना घडली आहे.

एका गैरसमजामुळे घडला प्रकार

एका छोट्याशा गैरसमजामुळे हे सगळं घडलं. झालं असं की, त्या महिलेने आपल्या तिकिटावर बक्षीस लागलं आहे की नाही हे तपासण्यासाठी दुकानातील इलेक्ट्रॉनिक मशीनमध्ये तिकीट स्वाइप केलं. पण मशीनवर "पैसे देता येणार नाहीत" असा मेसेज आला. खरंतर, बक्षिसाची रक्कम खूप मोठी असल्यामुळे ती दुकानातून थेट देता येणार नाही, असा मशीनच्या मेसेजचा अर्थ होता. पण त्या महिलेला वाटलं की आपल्या तिकिटाला काहीच बक्षीस लागलेलं नाही. याच गैरसमजातून तिने ते कोट्यवधींचं तिकीट कचराकुंडीत फेकून दिलं.

पहिलं बक्षीस लागलेलं तिकीट कचऱ्यात

घरी पोहोचल्यावर तिच्या कुटुंबीयांनी तिला सांगितलं की, तिने नेहमी लावलेल्या तिच्या प्रियजनांच्या नंबरवर म्हणजेच 2, 4, 8, 10, 51 या अंकांवर पहिलं बक्षीस लागलं आहे. हे ऐकताच तिच्या पायाखालची जमीनच सरकली. ती धावतच लॉटरीच्या दुकानात पोहोचली आणि नंतर जिथे तिने तिकीट फेकलं होतं त्या कचराकुंडीजवळ गेली. पण तोपर्यंत तिथला कचरा सफाईच्या गाडीने उचलून नेला होता.

अखेर थरारक शोधमोहीम यशस्वी

यानंतर त्या महिलेने थेट स्थानिक कचरा व्यवस्थापन एजन्सीचे प्रशासक रॉबर्टो निकोला टोस्कानो यांच्याशी संपर्क साधला. खरंतर तिकीट सापडण्याची फारशी आशा नव्हती, पण टोस्कानो आणि त्यांच्या टीमने लगेच कचऱ्याच्या गाडीचा माग काढला आणि ती गाडी थांबवली. कचऱ्यात धोकादायक वस्तू असण्याची शक्यता असल्याने, ती गाडी खास सुविधा असलेल्या केंद्रात नेण्यात आली. तिथे सफाई कर्मचाऱ्यांच्या एका टीमने दिवसभर मेहनत घेऊन कचऱ्याच्या ढिगाऱ्यातून ते तिकीट शोधून काढलं. सुदैवाने, तिकिटाला कोणतंही नुकसान झालं नव्हतं, असं टोस्कानो यांनी सांगितलं. जेव्हा त्यांनी ही आनंदाची बातमी देण्यासाठी महिलेला फोन केला, तेव्हा तिला आनंदाश्रू आवरता आले नाहीत. ही एक सार्वजनिक एजन्सी असल्याने, शोधासाठी लागलेला अतिरिक्त खर्च उचलण्यास महिलेने तयारी दर्शवली आहे, असंही रिपोर्टमध्ये म्हटलं आहे.