पार्किंग दंडाचा धक्का! पाच मिनिटांसाठी २ लाख रुपये

लंडन: पार्किंग शुल्क भरण्यासाठी पाच मिनिटांपेक्षा जास्त वेळ लागल्याने एका महिलेला १९०६ पौंड (२ लाख रुपये) दंड ठोठावण्यात आल्याची तक्रार समोर आली आहे. ब्रिटनमधील रोजी हडसन या महिलेने ही तक्रार दाखल केली आहे. शुल्क भरण्याचे यंत्र बिघडल्यामुळे पैसे भरण्यास उशीर झाल्याचे रोजीने स्पष्ट केले. मात्र, एक्सेल पार्किंग लिमिटेडने १४ ते १९० मिनिटांपर्यंत वेळोवेळी विलंब झाल्याचे दाखवून महिलेला नोटीस पाठवल्या.  

एक्सेल पार्किंग लिमिटेडने रोजी हडसनला १० पार्किंग शुल्क नोटिसा पाठवल्या आहेत. इतका मोठा दंड ठोठावण्यात आल्याबद्दल रोजीने नाराजी व्यक्त केली. मात्र, वाहन पार्क करण्यापूर्वीच पार्किंग शुल्क भरावे लागते आणि ते पाच मिनिटांच्या आत भरावे लागते, असे बोर्डवर लिहिलेले असल्याचे एक्सेल पार्किंग लिमिटेडने स्पष्ट केले. नियमावली वाचून समजून घेणे ही वाहन चालवणाऱ्याची जबाबदारी असल्याचे कंपनीने म्हटले आहे.

गेल्या वर्षी फेब्रुवारीपासून रोजी हडसन कोपलँड स्ट्रीट कार पार्किंगचा वापर करत आहे. येथील पार्किंग यंत्र पूर्णपणे बंद असल्याने तिने फोनवरील अ‍ॅपद्वारे पैसे भरल्याचे रोजीने सांगितले. दररोज ३.३० पौंड भरल्याचेही तिने स्पष्ट केले. सुरुवातीला दंड भरण्यासाठी एक नोटीस आली. २८ दिवसांच्या आत १०० पौंड भरावे लागतील, असे नोटीसमध्ये म्हटले होते. १४ दिवसांच्या आत भरल्यास ६० पौंड भरावे लागतील, असेही नोटीसमध्ये होते. त्यानंतर आणखी नऊ नोटिसा आल्या. त्यामुळे दंडाची रक्कम १,९०५.७६ पौंड झाली.

एक्सेल पार्किंग लिमिटेडचा दावा आहे की रोजी हडसन सरासरी एक तास उशीर करून पार्किंग शुल्क भरत असे. अ‍ॅपद्वारे पैसे भरताना प्रक्रिया होण्यास उशीर होतो, त्यामुळे कंपनीचा दावा हास्यास्पद असल्याचे महिलेने म्हटले आहे. हा खटला न्यायालयात सुनावणीसाठी प्रलंबित आहे. हा केवळ तिच्यासाठीचा कायदेशीर लढा नसून अशाच परिस्थितीतून जाणाऱ्या इतरांनाही मदत होईल, असे रोजीने म्हटले आहे.