Gym Fight Video: जिममध्ये डंबेल जागेवर न ठेवल्याने राडा, महिलेला थेट मारहाण
सार
चीनमधील एका जिममध्ये डंबेल वापरल्यानंतर जागेवर न ठेवल्याने एका महिला आणि पुरुषामध्ये जोरदार हाणामारी झाल्याचा व्हिडीओ व्हायरल होत आहे. जिममधील इतर सदस्यांनी मध्यस्थी करून हा वाद सोडवण्याचा प्रयत्न केला.
जिममध्ये व्यायाम करताना काही नियम पाळणं अपेक्षित असतं. पण चीनमधील एका जिममध्ये डंबेल वापरल्यानंतर ते रॅकमध्ये ठेवण्याऐवजी खालीच टाकून दिल्याने मोठा राडा झाला. या घटनेचा व्हिडीओ सध्या सोशल मीडियावर चांगलाच व्हायरल होत आहे.
व्हिडीओमध्ये दिसतंय की, एक महिला दुसऱ्या एका महिलेच्या मदतीने बेंचवर डंबेल वर्कआऊट करत आहे. पण व्यायाम संपल्यानंतर तिने ते डंबेल रॅकमध्ये ठेवण्याऐवजी थेट फरशीवर टाकून दिले.
तिथेच जवळ व्यायाम करणाऱ्या एका व्यक्तीने हे पाहिलं आणि तिला ते डंबेल जागेवर ठेवण्यास सांगितलं. सुरुवातीला दोघांमध्ये फक्त शाब्दिक बाचाबाची झाली, पण काही वेळातच या वादाचं रुपांतर मोठ्या भांडणात झालं.
ती महिला जागेवरून उठली आणि दोघांमध्ये धक्काबुक्की सुरू झाली, तेव्हा परिस्थिती अधिकच बिघडली. त्या व्यक्तीने तिला पकडून धक्का दिला आणि सलग दोनदा तिच्या चेहऱ्यावर ठोसे लगावले. हे पाहताच जिममधील इतर लोक त्यांना सोडवण्यासाठी धावून आले. पण काही क्षणांतच तिथे मोठी गर्दी जमली आणि एकच गोंधळ उडाला. या व्हिडीओमध्ये लोक त्यांना वेगळं करण्याचा आणि परिस्थिती नियंत्रणात आणण्याचा प्रयत्न करताना दिसत आहेत.
पाहा व्हायरल सीसीटीव्ही व्हिडीओ
A woman drops dumbbells on the gym floor after finishing her workout. When a man confronts her and asks her to put them back, she ignores him.
The man then grabs her, shoves her and punches her twice. 💀 https://t.co/tButuwtF9r
— Ghar Ke Kalesh (@gharkekalesh) November 10, 2026
ही घटना नेमकी कुठे आणि कधी घडली, याला अद्याप अधिकृत दुजोरा मिळालेला नाही. तसंच, भांडण होण्यापूर्वी ती महिला आणि पुरुष एकमेकांना ओळखत होते का आणि या हाणामारीत कुणाला गंभीर दुखापत झाली आहे का, हेसुद्धा स्पष्ट होऊ शकलेलं नाही.
कॅमेऱ्यात रेकॉर्ड झालेल्या या घटनेपूर्वी नेमकं काय घडलं होतं आणि हा वाद इतक्या विकोपाला का गेला, याची अधिक माहिती अजून समोर आलेली नाही.